$e@rch!nG fOR m@ oWn LeGenD

نعى بوش ..وعندما تتحدث الجزم!!

2009-01-07T03:43:00.001+03:00

وانا بقلب كده فى المنتديات لاقيت خبر ...بصراحة قلب دمى و حرقه

وحبيت اجيبه عشان يحرق دمكوا انتو كمان ومعرفش ليه لاقيت المثل بتاع

اللى عنده دم احسن من اللى عنده عزبة

حاضرنى اوى

الخبر ان

بوش ابو قلب حنين..القطة بتاعة بناته توفاها الله سبحانه وتعالى-معلش انا عارفة ان الموضوع صدمة عليكو--والتى رحلت عن عمر 18 عاما بمقر اقامتها فى البيت الابيض

وبهذه الكلمات الرقيقة خرج بيان رسمى من البيت الابيض لنعى فقيدة القطط انديا معلش اصحاب القلوب الرهيفة يمتنعون عن قراءة البيان:

وقال البيت الأبيض في بيان

إن الرئيس بوش وزوجته وابنتيه، يشعرون بحزن عميق لرحيل “إنديا، وأكد البيان أن “القطة السوداء، ذات الشعر القصير، عاشت كفرد من العائلة قرابة عقدين”. واختتم البيان بقول ان “إنديا كانت عضواً محبوباً في عائلة بوش لقرابة عقدين من الزمن، والجميع سيفتقدونها كثيراً”.

حسبى الله ونعم الوكيل بجد البيان ده بيطلع فى الوقت

اللى حصلت فيه الغارة من الكلاب على مدرسة كانت بتؤوى المئات من اللاجئين الفلسطنيين اللى احتموا فيها من القصف ليرتفع عدد القتلى الى اكثر من 630 و الجرحى لاكثر من2800 من بداية العدوان

جدير بالاشارة ان الجزمة-قصدى بوش مع الاعذار للجزم- صرح يوم الاتنين انه

بيتفهم رغبة “إسرائيل” في الدفاع عن نفسها

فعلا عندما تتحدث الجزم نعرف ان

اللى عنده دم احسن من اللى عنده قطة

حسبى الله و نعم الوكيل

الحمد الله....بالقطن الكاميرونى ...غزلنا تيشرتات الاهلى لليابان

2008-11-17T04:33:00.004+03:00

الحمد لله

الف حمد وشكر ليك يا رب العالمين

بحبك يا اهلى

بحبككككككككككككككك يا اهلى

مبروووووووك للاهلاوية فى شتى بقاع الارض و مجرة ضرب التبانة كلها

انا فرحانةةةةةةةةةةةةةةةةةةة

ربنا يخللنا الاهلى

ومن نجاح لنجاح يا رب ان شاء الله

وباذن الله هانيمك من المغرب يا يابان

انا الاهلى انت مين؟؟؟؟؟؟؟؟؟؟؟

اخدت الجيرب ..و اوووووه تحدى

2008-11-15T07:17:00.004+03:00

انبارح كنت فى فرح واخدت الجيرب من العروسة لولولولولولى

لالا اوعوا تفهمونى صح

وتفتكروا انى ملهوفة على الجواز و كده

نو

جاميه

ابسولتلى نو

كل الموضوع بس اننا كنت واخدة موضوع الجيرب ده تحدى

لانى طوووووووووهوقت منه

اصل عيلتنا ولله الحمد ..فى ماسورة جواز و خطوبة ضاربة فيها من حوالى سنتين كده

الشباب كان كله معنس ومرة واحدة ربنا سهلها على الجميع

كنت دايما فى حوار الجيرب ده لما يقولوا فى الدى جيه ..صحاب العروسة اللى لسه احم-ماتجوزوش-يجوا يقفوا وراها على ما سلامتها تحدف الجيرب

كنت بفك انا من الحوار ده

و كان دايما اهلى يقعدوا يقولولى قومى واقفى و كده

ولله الحمد كنت كل ما اسمع كلامهم اقوم اتكسف كسفة سودة

ياما لاحقش امسكه..رد فعلى بطىء اوى :) ...او اقف ورا العروسة ..وتروح العروسة مدورة و مدياه لواحدة معينة بيبقى منظرى استغفر الله العظيم

حتى فى فرح اختى

اختى قابلها قالت انها ناوية تلف و تدهولى

كوسة بكوسة بقى

لكن بابا ولله الحمد ..قالها لا ماينفعش كده وقالها فيما معناه

دى حاجة زى فقرة ثابتة فى كل فرح...ولازم نسيب المنافسة اللى حى تحدد مين اللى هتسمك الجيرب

وشوية شوية كان هيكلمنا عن نظرية تكافؤ الفرص فى ظل انهيار البورصة العالمية و اثرها المباشر على اضمحلال الخلاق و القيم

تقولوش كانت هتدينى الوزارة ..مش شوية ورد بايت:(

ام هند

وبالفعل فى فرح اختى

الجيرب وقع فى ايد بنت عمى قبل حتى ما الحق اعمل خطوتين

ومرات خالى قعدت تقولى

يا خايبة:(

الله وانا اعمل ايه ما هما اللى قالولى

ومرت الايام وقلت خلاااااااص انا مش هتنيل اقف تانى ..كرامتشى فوق كل اعتبار

وفعلا فى فرح بنت عمى مش اللى اخدت الجيرب واحدة تانية

قعدت فى مكانى بكرامتشى

ولا اتهزت منى شعرة واحدة

لاقتها جاية تقولى بعد الوفيه

انتى ما وقفتش ليه ..انا كنت عايزة احدفهولك:(((

ومرت الايام

وتقلص عدد عرايس العيلة الاكبر منى

وما بقاش فاضل غير واحدة بس اكبر منى

وهى سمية بنت خالتى اللى كان فرحها انبارح

قلت يلا بقى

ده اخر فرح للعيلة:ي فلازم الواحد يسيب ذكرى طيبة ...هيوحشهم هما جو الافراح يا عينى

قلت مش هخسر حاجة

اقف واجرب

وبالفعل

وقفت ورا العروسة

هووووووب

ولا امير عبد الحميد فى زمانه معلش نفسى مش صافية للحضرى عشان اضرب بيه المثال

انقضيت على الجيرب

بينى و بينكو انا شاكة ان البت بنت خالتى ..كان قصدها تحدفوا قريب منى

بس

قصدها مش قصدها

كوسة مش كوسة

انا اللى سوقت الفيكترا يا منى

قصدى

انا اللى مسكت الجيرب

وانا اللى اتصورت مع العرورة و العرير وانا مسكاه وش بيريل

وعلى المتضرر اللجوء للفيفا

كنت فرحانة جدا انى حققت التحدى الاعظم ده

ولو ان حوار الجيرب ده جابلى وقع الدماغ..وسمعنا كلام مالوش لازمة

كلام بقى من عينة

عقبالك

انتى اللى عليكى الدور

خلاص بقى مالكيش حجة

:((((

احلى حاجة ..ودى اللى خلت الليلة تعدى على خير و الحمد لله

ان احمد ابن خالى ماكنش موجود...كيف عنده يتيريق على خلق الله

والحمد لله ماكنش هيعتقنى لوجه الله تعالى

مش بعيد يقوم يتريق فى المايك

عشان تعرفوا ان انا بت طيبة و ربنا بيحبنى

المهم احب اوجه تحياتى و تهنأتى القلبية من موقعى هذا من خلف شاشة الكمبيوتر

لسمية العروسة و عريسها نبيل ..واتمنالهم السعادة واهدى الزغروتة دى ليهم و

لماما وبابا و تيتية و شيرين اختى ومريم بنتها ومحمد جوزها جوز شيرين مش مريم بلاش ذكاء واحب اسمع اغنية ست الحباييبت يا حنايا انت

بيس

حاليا بجميع دور العرض - انتخابات امريكا 2008

2008-11-08T06:08:00.006+03:00

المكان:el living room
الزمان: من الساعة الثانية صباحا- حتى الثامنة صباحا
الحدث: يوم الانتخابات الرئاسية الامريكية

لب ومية و بيبسى ماكس و لبان وقنوات العربية و الجزيرة والحرة والبى بى سى

بهذه الاشياء امضيت الساعات الاخيرة قبل اعلان نتائج الانتخابات الامركية ..ربما يتسال البعض ويقول
"على ايه كل ده ..واحنا مالنا"
وربما يقول اكثر المهتمين بالحدث
"كفاية نعرف مين اللى كسب و خلاص"
وربما يقول البعض الاخر الذى يعرفنى جيدا على المستوى الشخصى وربما هو السبب الاكتر وجاهة و منطقية
" صحيح الفاضى يعمل قاضى:)) "
وعلى الرغم من منطقية هذه العبارات كلها ..والتى اعجز عن تحديد صحتها من عدمها ..الا انى ظللت اتابع فى شغف دون محاولة لارهاق نفسى فى التفكير فى منطقية هذا الاهتمام

ربما لن تكون مبالغة منى عندما اقول اننى نسيت وانا اتابع انها انتخابات
مخطىء من يقول ان هذه كانت انتخابات ...فتلك كانت اشبه بعرس سياسى او فيلم سينمائى لم يبخل منتجه او مخرجه بشىء حتى يتحفنا بتلك اللوحة السياسية جميلة ...او ربما كان اشبه فيلم حزين ودرامى لا يفعل شيئا سوى تقليب المواجع و العكننة والتحسر لاى مواطن من العالم التالت وكل واحد عارف نفسه
فالامر لم يعد بالنسبة اليهم-الامريكان-مجرد شفافية ونزاهة انتخابات او شعب يمارس ا-ب حقوق ..

بل ان الامر تعدى الى كونه تحرر كامل من كل الاعتبارات و الحسابات فى اختيار من يريده الشعب؟!
كم من المحبط لاى منا ...عاطل عن العمل ..محبط سياسيا واجتماعيا
ان يشاهد فى تلك الانتخابات المأساوية بالنسبة الينا
سيدة مرشحة من حزبها للانتخابات و ينافسها على ذلك شاب اسود
ثم ينتصر هذا الشاب ثم يقف فى مواجهة ثعلب جمهورى عجوز ..اعطت و اخذت معه الحياة السياسية كثيرا..وبدون وساطة ولا محسوبية ولا لافتات " حتى الجنين فى بطن امه يقول نعم لاوباما "..ربح الشاب المعركة ووصل الى سدة الحكم محطما رواسب عنصرية و عرقية بغضية معلنا ان الصندوق الانتخابى معصوب العينين ..يخرج من داخله ما اختاره الشعب دون اى تدخلات او فرض او وصاية او لسه مفيش الشخص المناسب اللى يشيل المسئولية
ولعل اكثر المشاهد اثارة فى هذا الفيلم الرائع ..مشاهدة القنوات -اللى مش مصرية طبعا- وهى تصعد من اثارة الاحداث وهى تضع جملة 270 للفوز

وهى عدد النقاط التى يفوز من يجمعها بالبيت الابيض
وتراقص ارقام المرشحان اوباما و ماكين
"اوباما ربح بنسلفانيا" .

".ماكين ربح كنتاكى"
"ماكين يحتاج الى انديانا لكى يفوز"
يالها من عبارات ساعدت على تصاعد الاحداث واثارتها

وصور لحشود الامريكان منتظرة فى الساحات للاحتفال مع من اختارته ليحكمها
وتذكرت مع الاسف المشهد الحزين لمسرحية2005 ..اقصد انتخابات 2005 فى مصر واللجان الانتخابية وهى خاوية ...ورئيس حزب ملقى فى غياهب السجن لكونه تجرأ و تمادى و تجاوز فى ترشيح نفسه !!

ومع اعلان اوباما الرئيس رقم 44 للولايات المتحدة الامريكية
يتقافز الى الزهن عدد الرؤساء الذى حكموا مصر منذ اعلانها جمهورية ولو ان ماكنش ليها لازمة
وكم كان الرقم كوميديا

4 رؤساء فقط فى مواجهة 44 رئيسا امريكيا:))
قد يقول البعض ان امريكا نظامها جمهورى قبل مصر مصر بسنوات عدة
ولكن بحسبة بسيطة سنجد ان ايضا الفارق ليس فى صالحنا على الاطلاق
فى مصر تم اعلانها بالنظام الجمهور عام1953
وفى نفس العام تم تعيين دوايت ايزنهاور رئيسا رقم 34 للولايات المتحدة
اى
ان مصرمنذ اعلانها جمهورية مر 11 ريئسا امريكيا على الحكم
فى مواجهة 4 فقط لمصر

وليت هؤلاء الاربعة قد حكموا مصر خلال ال 56 عاما بمدد متساوية
فاذا جمعنا مدة حكم اول ثلاتة رؤساء وهم محمد نجيب-عبد الناصر-السادات سنجد 28 عاما مجتمعين

فى مواجهة 27 عاما للرئيس الحالى مبارك
مع ملاحظة ان اى منهم لم يترك الحكم باعتباره رئيس سابق ولكن بصفة رئيس راحل بالطبع مع استثناء محمد نجيب الذى عزل من منصبه بعد عام واحد من توليه الحكم!!

رغم انك لا تفرق عن بوش كثيرا...بل ربما العن و اضل منه سبيلا...الا اننى لم اتمكن من مقاومة شبح الاحترام الذى راودنى وانا استمع الى خطبة اعلانك لهزيمتك امام اوباما دون اى تجريح او محاولة للتشكيك او كلام عن مؤامرة يقال كثيرا فى بلادنا فى مثل هذه المواقف واعلانك لمؤازرة اوباما فى مهمته فى قيادة الوطن

لن اقل انك نزيه وشريف وانك لم تستعن اثناء حملتك الانتخابات -او حتى اوباما-لطرق الدعاية السلبية و تلطيخ سمعة الخصم...فتلك قواعد اللعبة ..ولكن بعد صافرة الحكم يعود كلا الى موضعه ويعلن الفائز عن فوزه و الخاسر عن هزيمته بكل احترام

مثلك مثل منافسة اوباما ،هيلرى كلينتون التى خاضت منافسة شرسة مع اوباما فى الانتخابات التمهيدية للحزب الديموقراطى ولكن بعد اعلان فوز اوباما اعلنت على الفوز مؤازرتها لاوباما فى الانتخابات لانه يمثل حزبها ..

اشياء نفقتدها كثيرا فى احزابنا المصرية ولنا فى موسى مصطفى وايهاب خولى رئيس حزب الغد ووصول الصراع بينهم الى ساحات القضاء خير مثال!!!

باراك حسين اوباما

نعتبرك قصة كفاح واصرار على عدم الرضى بدور الضحية المضطهد ، فكسرت الاعتقاد الغربى الشائع الذى يقول ان دائما الزنوج والعرب غاضبون طبعا عشان الشعور بالاضطهاد بابتسامتك الواثقة وقبول النقد والحوار و فرض شخصيتك لنفسها منذ دخولك الساحة السياسية

فمن خريج من جامعة كولومبيا فى نيويورك ودراستك للعلوم السياسية ثم الانتقال الى شيكاغو للعمل باحدى الولايات الحكومية لمدة ثلاث سنوات ونص

ثم الانتقال لجماعة هارفرد لدراسة القانون وبعد التخرج تصبح اول افريقى يتولى منصبا مرموقا فى الجامعة

ثم عودة مرة اخرى الى شيكاغو وتمرس مهنة المحاماة لتتخصص فى مجال الدفاع عن الحقوق المدنية والتى دافعت من خلالها عن قضيتك فى المقام الاول قيل ان تكون قضية زبائنك من ضحايا التمييز فى العمل والسكن

الى
اقتحامك للعمل السياسى بدخولك مجلس ولاية الينوى وحصولك على لقب السيناتور
ولم تحتاج الى وقت كثير فى مجلس الشيوخ حتى تكون نجما اعلاميا صاحب كتابين حققا اعلى مبيعات فى امريكا

ولم يكن دخولك تاريخ الولايات المتحدة كاول رئيس امريكى من اصل افريقى وليد وقت توليك حكم امريكا فقط..

فلقد كنت الافريقى الوحيد بين اعضاء مجلس الشيوخ المئة وخامس امريكى ذول من اصول افريقية يدخل الى مجلس الشيوخ

ولعل اكثر ما رفع اسهمك لدى العرب غير نجاحك واصرارك ...هو موقفك من الحرب على العراق حيث انك كنت من اهم المناهضين للحرب ..بالطبع ليس لسواد اعيننا نحن العرب او عشقك لصدام ..ولكن لخوفك واهتمامك بالجنود الامريكان و اسرهم ويموت منهم الكثير حتى الان

وربما ايضا لتركيزك فى برنامجك الانتخابى على شئون امريكا الداخلية والنهوض بها و تخليصها من الازمة الاقتصادية التى لم تمر بها منذ مطلع القرن الماضى

بالاضافة الى عزمك الى سحب الجنود من العراق.بالطبع ليس ايمانا

بان العراق ماطلعش فيها نووى ولا ان البترول اللى بتشفطوه خلص..

ولكن لتوفير ما يساوى 700مليون دولا تدفع -على الريق كل يوم- تكاليف للحرب

وقبل ان ندخل فى مزايدات سياسية و سماع عبارات من عينة

"ناقص نقول اوباما رضى الله عنه"

او

" زيه زى غيره"

احب ان اقول اننى او اى عربى مؤيد لاوباما ليس بالسذاجة التى تجعلنا نتصور ان اوباما سيكون حامى حما العرب وان سياسته ستختلف كثيرا عن من سبقوه ، فالاجندة الامريكية فوق الجميع ..وسيظل الدعم اللا محدود لاسرائيل هو شغال امريكا الشاغل...

اوباما او غير اوباما لن يختلف الامر كثيرا...فهذا اتجاه دولة

ولسنا بالسطحية الكافية لننخدع باسم باراك حسين اوباما..فهو مجرد اسم كغيره من الاسماء

وكون انك الوحيد من اتفق عليه اليهود والعرب معا

امر لا يثير الاهتمام كثيرا...فالوصول الى كرسى الحكم فى امريكا من المعروف انه لابد وان يكون بالمباركة الصهيونية

ولكن كل ما فى الامر هو اعجاب بقصة نجاح واصرار على الوصول

واخيرا اختتم بعبارة قرأتها واعتذر لصاحبها لانى لا اعرفه لكى اعرف اسمه

لا تلوم امريكا على قوتها ولا اسرائيل لحفاظها على وجودها

لا تلومن الا نفسك

خروج من الجسد - قصة

2008-10-23T21:00:00.003+03:00

نظر (احمد) فى ساعته للمرة العاشرة منذ قدومه فى عيادة الدكتور محمد طاهر العليمى، احد اشهر اطباء الجلدية و التناسلية فى القاهرة ، وشعر بحنق رهيب وهو يرى انه منتظر منذ اكثر من ساعة وما زال امامه 5 افراد قبل ان ياتى دوره ، كان يشعر بملل حقيقى . اخذ يراقب من حوله على امل ان يلهى نفسه باى شىء، كان يعلم انه زائر العيادة الدائم ...المرضى والوجوه تتغير وهو الشىء الثابت الوحيد بينهم .
شعور مؤلم حقا ان يياس المرء من علاجه ...كان يعانى من بشرة حساسة للغاية ...مغطاه تماما بالحبوب و البثور ...اى تعرض كثير للشمس او حلاقة غير حريصة ولا متأنية كفيلة بتحويل وجهه الى كتلة من الدماء و الالتهابات ، منذ بداية فترة المراهقة وهو زائر دائم لعيادات الامراض الجلدية ..الى ان سمع منذ حوالى 5 اشهر عن ذلك الدكتور ...واستخدامه لاحدث التقنيات فى العلاج امثال الليزر و الرنين و غيرها من الطرق

وصارحه طبيبه منذ البداية ان حالته تحتاج الى وقت طويل فى العلاج و لكن امكانية العلاج موجودة، كان احمد متحمسا فى البداية ..ولكن مع مرور الوقت وبطء التحسن و عدم حدوث تغييرات جذرية او واضحة جعله اليأس يتسرب اليه على الرغم من ملاحظات الدكتور الدائمة له ان حالته فى تحسن مستمر و ان درجة استجابته للعلاج جيدة للغاية بالمقارنة مع حالة البشرة

طوال خمس شهور يسمع كلام هذا الطبيب حتى كاد ان يحفظه
-اصبر شوية
-الموضوع مش سحر
-البشرة دى كذا طبقة وانت عندك البكتيريا مترسبة فى طبقات مختلفة وفى صبغات كتير ........الخ
الى اخر هذه الخطب الطبية التى يبغضها ..والتى يستطيع ان يجمع محصلتها فى جملةو واحدة "ان الوقت لسه طويييييل"

كان (احمد) منطوى بطبعه بالاضافة الى مشكلة بشرته هذه جعلته دائما منطو يخجل من مواجهة الناس ...محاولات عدة قام بها ليكون مجموعة اصدقاء مقربين خلال سنوات الجامعة ولكن كلها باءت بالفشل و الانسحاب الفورى من جانبه مع اول نظرة تأملية فى وجهه ..يعرفها هو تلك النظرة التى ينظر اليه بها من لا يعرفه و ينظر الى وجهه و يتامل تلك البثور و الالوان الداكنة و الحمراء التى تكسو وجهه.
ربما كانت القراءة هى الملاذ الوحيد له فى هذه الحياة..ايضا متابعة مبارايات كرة القدم كانت من ضمن هواياته والنوم لساعات طويلة...يجد فى النوم وسيلة ذهبية للهروب من حياته.
ظل متململا فى جلسته ..ووقع بصره على مجموعه من المجلات فوق المنضدة التى تنتصف غرفة الاستقبال ،كانت العيون كلها متوجهه اليه و تراقبه وهو يتجه للمنضدة مما اشعره بخجل وارتباك ولم يتمكن من المفاضلة بين المجلات ...فقام باخد مجلتين فى عجلة دون ان ينظر اليهم و عاد الى مقعده مسرعا،وخاب امله عندما نظر فى المجلات التى احضرها . الاولى كانت مجلة نسائية ، مكتزة باعلانات مستحضرات التجميل ...ومقالات عن عدد حالات الطلاق المرتفع فى الوطن العربى ...واحدث الازياء..اغلقها على الفور
وامسك المجلة الثانية التى كانت ارحم بالنسبة اليه من الاولى ..كانت مجلة طبية
وعبثا اخذ يتصفحها فى ضجر ...كانت مقسمة الى تخصصات طبية عدة...اخبار و عناوين كثيرة عن اكتشاف العلماء لدواء جديد...
اجراء عملية بنجاح
ووسط مقالات و عناوين عدة استوقفه مقال صغير على هامش الصفحة ..لم يكن المقال ذاته هو ما استوقفه ..ولكن صورة كاتب المقال هو الذى استوقفه ..كانت لرجل مكتز الوجه ...ذو لحية كثيفة و محملقا فى الصورة بنحو مبالغ فيه...كان مظهره كوميديا بعض الشىء وكان عنوان المقالة :
"تجربة الخروج ما بين حقيقة و خيال"
جذب العنوان انتباهه قليلا.. وسال نفسه ما المقصود بالخروج؟؟
قرر ان يقرا المقالة...وفور ما ان بدا المقالة لم يشعر بنفسه الا وهو فى نهايتها ..وفور ما ان انتهى منها ..لم يصدق نفسه... وكأن تلك المقالة هى شرح تفصيلى لما يحدث له دائما ...ولكن لم يكن يعره الاهتمام الكافى ..اخذ يقرا المقالة عدة مرات ..وفور ما ان ينتهى منها يشعر بالحنق لانها كانت قصيرة جدا ..ولا تشفى حجم الفضول لديه لمعرفة المزويد و المزيد كانت المقالة:
تتمثل ظاهرة الخروج عن الجسد فى عملية شعور الشخص بأنه خارج جسده الفيزيائي و يدرك ذلك بوعيه الكامل . هذا الوعي الذي يرافقه أثناء خروجه ، و يبغى الجسد في حالة غيبوبة أو نوم عميق !. أي أن عند خروجه من جسده ، يبقى محافظاً على قدرته على الإدراك ، و التفكير ، و حرية التصرّف و اتخاذ القرارات حسب الحالة !. كل هذه الميزات ترافق الشخص ( أو روح الشخص ) أثناء خروجه عن جسده !.يشعر الخارجين عن جسدهم بأنهم يستطيعون التنقّل بحرية من مكان إلى آخر ، و يمكنهم الانتقال إلى أماكن بعيدة عن موقع أجسادهم الفيزيائية ، و يدركون مشاهد و أحداث كثيرة ، و يستطيعون حفظ تلك المعلومات في ذاكرتهم و العودة بها إلى جسدهم الفيزيائي !.غالباً ما تحدث هذه الحالة بشكل تلقائي ، دون معرفة مسبقة من الشخص . خاصةً الذين يكونون في حالة مرض خطير أو غيبوبة أو على حافة الموت !.لكن بنفس الوقت ، يتمتع بعض المتصوفين و الروحانيين و الشامانيين بهذه القدرة ، و يمكنهم استنهاضها بأي وقت يشاءون

"استاذ احمد دور حضرتك"
انتزعه صوت الممرضة من حبل افكاره ...ولاول مرة منذ قدوم احمد تلك العيادة يشعر بضيق من قدوم دوره..قام على مهل وهو ينظر نظرة اخيرة فى المجلة و يحاول ان يحفظ اسم كاتب المقالة و اسم المجلة ..كانت الممرضة تراقبه فى شىء من الدهشة ...انتبه احمد لذلك فترك المجلات ووضعها بعناية فائقة على المنضدة ودخل على طبيب...وطوال الجلسة ظل مقتضب الكلام، شارد الذهن، يكتفى فقط بالرد باجابات مقتضبة على الطبيب.. ويتحمل لسعات الليزر على وجهه دون ان شكوى او طلب لبعض الراحة
لدرجة جعلت دكتور محمد يساله فى شىء من الدهشة :
ايه مالك النهاردة يا احمد مش فورمة ..فى حاجة مضيقاك ؟؟؟
اجابه احمد ببعض الارتباك:
مش فورمة ازاى يا دكتور

- يعنى مش قاعد تشتكى من طول العلاج و تقول مفيش فايدة

ابتسم احمد ابتسامة باهتة :
لا ابدا يا دكتور...تقدر تقول نحست خلاص

-لا يا راجل ما تقولش كده ......الخ
لم يعر(احمد) لبقية الكلام اى اهمية

وقاطعه بسؤال سريع:
دكتور هو كل الكلام اللى بيتنشر فى المجلات الطبية بيكون صح؟؟

اندهش الدكتور لذلك السؤال المفاجىء ..ولكنه تدارك الموقف على الفور وقال له :
على حسب المجلة نفسها و سمعتها مش اى مجلة طبية تبقى مجلة موثوق فيها ...كمان مفيش حاجة فى الطب اسمها صح مية فى المية ..كلها بتكون نظريات و اراء بتطور مع الوقت ..يعنى اللى الصح النهاردة ممكن يكون غلط بكرة و العكس صحيح

احمد: طب و المجلات الطبية اللى بره عند حضرتك موثوق فيها
ضحك الدكتور ضحكة قصيرة وقال له:
انت مالك النهاردة يا احمد ؟؟ طبعا اكيد موثوق فيها
يلا يا استاذ جسلتك خلصت النهاردة معادنا ان شاء الله بعد 3 اسابيع
-اوك يا دكتور

**********************
كان (احمد) متعجلا على العودة فى منزل
لم يصدق يوما ان ما يمر به فى اوقات كثيرة له اصل ومعروف ..لم يكن يعلم الاسم العلمى لهذه الحالة ..كان دائما ما يطلق على هذه الحالة عندما تحدث له "الطيران" ...لأن بالفعل كانت تلك هى الحالة التى يمر بها ...حالة من الانسيابية الرهيبة ..والقدرة على التنقل بشكل سلس دون حواجز و قيود..وكأن روحه قد تحررت من قضبان جسده....كان كثيرا ما يقول لنفسه ان هذا مجرد حلم يمر به ..لكن عقله و قلبه دائما ما كانا يرفضان هذا التفسير...لم يكن ما يمر به مجرد حلم...كان ما يمر به حقيقى اكثر من اللازم ...يتحكم فى نفسه اكثر من اللازم ...وفوق كل ذلك...فهو يعلم اثناء طيرانه انه نائم ...عقله يقظ تماما ...احيانا كان يطير فى غرفته ..او فى اماكن لا يعلمها...لعل اقوى تلك المرات تلك التى حلق فيها فى غرفته...كان يشعر بكل شىء الى حد مخيف ...وشعر بطيف من الهواء يلامس وجهه وكانه يلامسه لكى يثبت له ان ما هو فيه الان واقع وليس خيال

هرع الى جهاز الكمبيوتر الخاص به فور وصوله الى منزله ...ودخل على موقع جوجل الشهير...وتسارعت اصابعه تكتب اى كلمة متعلقة بالموضوع

وجد نفسه يكتب
الطيران اثناء النوم ... ابحث

ظهرت له عشرات النتائج و الروايط غير متعلقة بالموضوع امثال:

طيار يابانى يغرق فى النوم اثناء رجلة جوية

الطائرة من الحلم الى حقيقة .

الخ...........

كلها غير متعلقة بالموضوع
حاول ان يتذكر اى لفظ علمى متعلق بالموضوع، تذكر كلمة الخروج التى قررها كاتب المقال كثيرا
وعلى الفور كتب
الخروج من الجسد+اثناء النوم ابحث

و
وتراصت امامه عشرات من الروابط المتعلقة بالموضوع

كانت عيناه تلتهم السطور بدون اى شعور بالوقت
وعرف ان الموضوع كبر بكثير مما كان يتصوره

-للأحلام مستويات متعددة من الوعي. المستوى الأقل هو الأحلام العادية التي يراها كل البشر، ولا نكون واعيين في الحلم.يأتي في المستوى الثاني نوع من الأحلام يكون فيه الرائي واعياً لأنه يحلم، ويستطيع أن يجوب عالم الحلم كما يشاء ويتحكم في مسار الأحداث، ولكن لا يشعر فيها بحواسه كاملة، ويسمى Lucid Dream.

- يتجول الذى يمر لتجربة الخروج بطريقة حقيقة ..وهو عدة أنواع منه خروج من الجسد في العالم الواقعي الذي نعيش فيه ..وخروج من الجسد في العالم النجمي أو ما يسمى بعالم الأحلام أو عالم الأفكار ..حيث لا أثر للمادة الجامده وتكون الأفكار والطاقات سيدة الموقف
-هناك أشخاص عديدين أبلغوا عن مرورهم بهذه التجربة عند تعرضهم لحوادث مميتة اقتربوا فيها من الموت أو ماتوا إكلينيكياً للحظات، وتسمى هذه الخبرات (near death experience)، ولكن الأمر يقتصر على هذه المرة، ولا تتكرر غالباً

قام الدكتور " دين شيلدز " بتحليل أكثر من ألف دراسة حول ظاهرة الخروج عن الجسد من 70 ثقافة مختلفة ( غير غربية ) . و أثبتت نتائج هذه الدراسة عكس ما كان يتوقعه ، فكان يتوقع ظهور تناقضات كثيرة في الروايات المختلفة المتعددة المصادر . أشارت النتيجة إلى وجود تطابق كامل في تفاصيل تلك الروايات المختلفة . و تأكد بعدها الدكتور شيلز بأن هذه الظاهرة هي عالمية و معروفة بين جميع الشعوب ، مما يدل على أنها ظاهرة واقعية .

الكثير من عمالقة الأدب العالمي الذين عاشوا في هذا العصر صرحوا للعلن في مناسبات مختلفة بأنهم خاضوا في تجربة الخروج عن الجسد ! مثل : أرنست همنغواي ، و د.هـ. لورنس ، و ليو تولستوي ، و دويستوفسكي ، و تينيسون أدغر ألان بو ، و فرجينيا ولف ، و غيرهم .. ـ الدكتور " روبرت كروكوال " ، قام هذا الرجل الذي لا يشكّ أحد بمصداقيته ، بدراسة تحليلية دقيقة لأكثر من 700 تقرير حول ظاهرة الخروج عن الجسد . و الذي أدهشه هو تطابق جميع محتويات هذه التقارير القادمة من جميع أنحاء العالم

خطوات التى تجعلك مهيأ للخروج :

قم باختيار غرفة هادئة جدا حيث لا يمكن لأي شيء أن يزعجك. إذا كان هناك بعض الضوضاء قم بتشغيل جهاز الراديو أو التلفزيون وأضبطه على موجة مشوشة بحيث تسمع وشوشة فقط واضبط مستوى الصوت بحيث لا يكون مرتفعا وإنما يكفي لتغطية صوت الضجيج الآتي من خارج الغرفة. لا تقم أبدا بتشغيل الموسيقى. تأكد أيضا من ملائمة درجة الحرارة لك مع ملاحظة أنك ستفقد بعض الحرارة أثناء القيام بالتجربة. تأكد أن يكون ضوء الغرفة ناعما وخافتا وليس مظلماً.تحتاج إلى كرسي مريح ذو دعامات للذراعين ومسند مريح للرقبة مع وجود بعض الميلان للخلف. في وضع الجلوس يكون احتمال نجاح التجربة أعلى من وضع الاستلقاء. لا تنسى أيضا وضع وسادة تحت قدميك. جرب هذا الكرسي وعدل في أوضاعه حتى تحس أنك مرتاح عليه. من المهم أيضا ارتداء ملابس فضفاضة ونزع الساعة، الخواتم وأي شيء قد يسبب مضايقات. (وضعية الكرسي تشبه إلى حد كبير وضعية كرسي الحلاق)يجب أن تكون متعبا بعض الشيء وليس متعباً جدا. لأن التعب البسيط يساعد في الاسترخاء أسهل وأسرع. ولكي تحصل على هذا الشعور قم بأداء بعض التمرينات المجهدة ثم قم بالاستحمام بالماء الدافئ المائل للحرارة ثم قم بالجلوس على الكرسي والاسترخاء. في هذه الحالة سوف يكون الجسد متعبا أما العقل فإنه سيكون يقظا وواعيا. إذا شعرت أن هناك بعض الريق الذي تجمع في فمك فابلعه حتى أثناء خروجك من الجسد.

قام من جلسته ..وهو متشوق لشىء واحد...هو خوض تجربة الخروج...هذه المرة ستكون مختلفة عن كل مرة ... لانه اصبح اكثر وعيا ومعرفة بها

قام على الفور ليفعل الخطوات اللازمة للتجربة اظلم الحجرة تماما ..وفتح لمبة خافتة للغاية تصدر ضوء ضعيف...واسترخى على السرير فاردا ذراعية على مصرعهما و واضعا بعد الوسادات تحت قدميه ...اخذ يتنفس بعمق وبطىء ...ويحاول ان يبعد عن اى فكرة ممكن ان تشتت تركيزه و بالفعل بدأ يشعر بوخز خفيف فى اطرافه و ... و فجاء انفتح باب الغرفة فى سرعة اقرب الى عنف ...وكان لوقع صوت فتح الباب فى اذنيه اشبه بدوى قنبلة
"احمد"
انتفض جسده ..وهو يقول :
فى ايه
لم تكن سوى اخته الصغرى (نهال) ...كانت تصغره بخمس اعوام ...كانت لا تزال فى المرحلة الثانوية

وفى خوف مصطنع مغلف بسخرية قالت:
ايه ده انت كنت بتحضر ارواح

زفر (احمد) فى ضجر وقال لها :
عايزة ايه يا نهال

قالت له نهال فى لامبالاة:
ماما بتقولك فى حاجة عندك عايزة تتغسل

قال (احمد) فى ضيق:
لا معنديش ..ومن فضلك فى اختراع اسمه تخبيط الناس بتستخدمه لما يدخله على حد
نهال:
على فكرة انا خبطت وانت ما ردتش
(احمد) فى ضجر:
طب يا ستى حقك عليا انا غلطان خدى الباب فى ايدك ..وسبينى انام

حاول (احمد) ان يسترخى مرة اخرى ولكن محال ان ياتى اليه النوم او اى صفاء ذهنى
غمغم احمد وهو يقوم من الفراش ليضىء الحجرة :
الله يسامحك يا نهال

ظل احمد بعد هذا اليوم لاسابيع عدة يحاول ان يخوض التجربة ...ولكن مع مرور الوقت بدا يتدارك ان الموضوع ليس بهذه السهولة ...وان الخروج ياتى اليه وقتما يشاء و ليس العكس
و مع مرور الوقت بدأ ينسى الموضوع تدريجيا

***********************

من مكان عال....وفى انسيابيه ..دون شعور بحواجز ...وتقيد بقوانين الجاذبية ....محلقا فى مكان لا يستطيع ان يحدد ان يعرفه ام لا،و
بعض الاشياء اللا منطقية ...ولكن بادراك كامل لكل شىء...هكذا شعر احمد.....وبنشوة حقيقة اخذ يردد يا الهى انه الخروج
ظل يعطى لنفسه تعليمات بالا يركز فى الاشياء حتى لا يستيقظ....كانت درجة شعوره بكل شىء متوسطة ...يخشى الاقتراب من الارض...يخشى النظر اسفل
كان ما يضايقه ان ظلام الليل هو ما حوله....و تحته على بعد مسافات تأتى اضواء باهتة ....بدا يتقلب و يجىء يمينا و يسارا....يا الهى كم يحسد الطيور على تلك الحرية
وكفيلم سينيمائى يتيغر المشهد دون سابق انذار امامه، وجد نفسه فى شارع مضاء اضاء خافتة خالى تقريبامن المارة ..لم يكن ماشيا على قدميه ولا طائرا...حالة من اللاشعور بكيفية الانتقال كانت تنتابة
ومن بعيد ...راى فتاة وفتى ..كم تبدو الفتاة مالوفة بالنسبة له لم تكن الاضاءة كافية لكى يرى الاشياء بوضوع من بعيد ...ولكن كل ما جذب انتباهه ..هو تلك السترة الزهرية التى كانت ترتديها تلك الفتاة كم تبدو السترة مالوفة ..حاول الاقتراب ليرى اكثر ..بدات ملامح البنت تظهر له ...و شعر بدهشة فور ما ان رااها ..كانت هى نهال ...حاول ان يقترب اكثر..ولكن بدا يشعر ان ادراكه بدا فى التلاشى تدريجيا من اثر التركيز حاول ان يبتعد ..كان بداخله غضب من رؤية هذا الشاب مع اخته فى هذا الشارع الخالى تقريبا من المارة فى هذا الوقت ....ومع ادراكه انه على وشك الاستيقاظ لا محالة ...اقترب مرة اخرى عله يختلس نظرة سريعة اخرى على وجه اخته ليتاكد و
فتح عينيه مرة واحدة ....كانت الغرفة مظلمة ...انتابه شعور فى البداية انه لايعلم ما الوقت....امتدت يده فى حركة تلقائية تلتقط هاتفه المحمول الملقى بجانبه على فراشه لينظر فى ساعته
Sun 02-11-2007 09:30 pm

كان لا يزال الحلم او الخروج مسيطر عليه....انها المرة الاولى التى يرى فيها اشخاص اثناء الخروج...كان سعيدا و غاضبا فى نفس الوقت، سعيدا انه خاض تجربة الخروج بعد فترة طويلة من الانقطاع و غاضبا من رؤية هذا الشاب . لم يكن يعرف هل ما مر به حقيقة ام حلم ، لاول مرة تمنى ان يكون هذا حلم . شعر بانه كاد ان يجن من التساؤل

ذهب الى حجرة المعيشة ووجد والدته جالسة امام التلفاز تتابع فى تركيز فيلما
قالت له فور ما ان راته:
صحى النوم...أيه النوم ده كله
اكتفى احمد بهز كتفيه ..وجلس وهو لا يزال يحاول استيعاد تركيزة وهو عابث الوجه و لاحظ غياب اخته نهال ...فقال له فى صوت متحشرج لم يصفو بعد من النوم :
اومال فين نهال مش ظاهرة ليه

الام:
ما انت عارف النهاردة الاحد ..معاد درس الفلسفة
انتبه (احمد) فى جلسته وقال لها وهو يعتدل:
درس لحد دلوقتى
قالت له والدته:
ايه يا بنى مالك ما هى بتاخد من اول السنة الدرس فى المعاد ده ...وعمرك ما قلت حاجة
احمد:
يعنى بالذمة يعنى يصح واحدة ترجع بيتها فى الشتا الساعة 10

الام:
يا بنى فى ايه...بيت المدرسة مش بعيد هما 5 دقاق ...وهى زمانها دلوقتى على وصول
احمد:
ماشى لما تيجى ليا كلام معاها

لم تمض اكثر 10 دقائق الا وسمعوا صوت المفاتيح فى الباب ...قام احمد من مجلسه على الفور ...قامت والدته ورائه وهى متعحبة من سلوكة العجيب
فور ما ان راى احمد نهال...شعر بالغضب يسرى فى عروقه.....شعر بصدمة حاول ان يخفيها ، كانت ترتدى نفس السترة التى راها بها فى اثناء الخروج
وبنبرة حادة قال لها:
كنتى فين؟
ارتمست الدهشة على وجه نهال وهى تقول له متحفزة:
فى ايه يا احمد كنت فى الدرس ..مالك؟

قال لها احمد مسرعا:
لا ماكنتيش فى الدرس

بدا الغضب الممزوج يرتسم على وجه نهال وهى تقول له:
انت اتجننت ولا ايه ؟؟؟
احمد:
حلو اوى اللهجة اللى بتكلمينى بيها دى
نهال فى عصبية :
وانت كمان حلو الاتهامات اللى بتقولهالى دى ..انت مالك فى ايه ...انت جاى ترمى بلاك عليا ...ما تشوفيه يا ماما بيقولى ايه

الام:
فى ايه يا احمد بس فى ايه.....صاحى من النوم عفاريتك بتتنطط ليه؟؟ ليه بتقول انها ماكنتش فى الدرس
احمد فى عصبية :
من غير ليه ....هى ماكنتش فى الدرس و خلاص....ورجوع بليل ده مش هيتكرر تانى الا لما انا اوصلها بنفسى وارجعها ...ولو ماردتش ....يبقبى مش هتشوف شكل باب البيت ..ان شاء الله تسقط السنادى، وهاتيلى نمرة المدرسة اللى كنتى بتاخدى عندها
الام :
لا ده انت اتجننت فعلا يا احمد .....مالك يا بنى ربنا يهديك

نهال وبدات دموعها تتساقط:
سيبيه يا ماما هو اصله عايز يعمل فيها راجل عليا ....وعشان اثبتلكوا انى كنت فى الدرس...عندكو نمرة ميس نادية اسالوها

الام مقاطعة فى حدة :.
انتى بتقولى ايه يا نهال......سيبك من تخاريف اخوكى ....انا مش ممكن اسوء سمعتك قدام مدرستك ..واسالها بنتى كانت عندك ولا لا ؟؟ انا واثقة فيكى

احمد :
يعنى ايه يا ماما بقولك بنتك ماكنتش فى الدرس و كانت سارحة فى الشوارع وانتى تقوليلى انا واثقة فى بنتى...هو انا يعنى هتبلى عليها

الام مقاطعة فى صرامة:
يا تقولى عرفت منين الكلام ده ...وانت على يدى نايم من قبل ما هى تنزل و ما صحتش غير من نص ساعة .....يا اما هعتبر كل اللى قولته ده تخاريف فى تخريف.....ماتفتكرش ان عشان ابوك مش موجود ...انك هتكون صاحب الكلمة فى البيت ده...الكلمة الاولى و الاخيرة ليا انا

شعر احمد فى حنق ..بالطبع كان اى حديث عن الخروج او طيران وما الى ذلك ..اشبه باستخراج شهادة خلل عقلى امام نهال و امه
اكتفى بغمغمة وهو يدخل الى غرفته و يغلق الباب بقوة

ظل طوال الليل يفكر فى كل شىء ...يتذكر ما شاهده اثناء الخروج ...واحساسه بكل شىء مر به....كان فى بعض الاحيان يقول لنفسه ربما يكون مجرد حلم ...ولكن كانت موضوع السترة بمثابة تاكيد له بان ما مر به كان حقيقيا ..ظل يفكر و يفكر طوال الليل ...ألا اذن الفجر ....قام وصلى وبعد الانتهاء ظل جالسا فى مكانه يفكر فى كل شىء ..شعر بنعاس قام وفور ما ان وضع راسه على الوسادة استقر فى نوم عميق....استيقظ فى صباح اليوم التالى باكرا ..ظل طوال اليوم ماكثا فى غرفته ..الا للخروج للحاجات الضرورية ...متجنبا نظرات امه و اخته التى كانت ترمقه بغضب كلما راته
ظل طوال اليوم اما يقرا او جالسا على الكمبيوتر...وعندما جاء الليل ارتدى ملابسه متجها الى الدكتور محمد فاليوم كان معاد جلسته

دخل العيادة ...كانت خالية الى حدما مقارنة مع الايام الاخرى...طوال جلسته منتظرا ظل يتحاشى النظر الى جهة المجلات ..ثم ما لبث الا وان قام و اخد المجلة الطبية التى كان قد قراها من قبل ...فتح على الصفحة التى قرا فيها المقالة...خيل اليه للحظة انه لن يجدها وان كل ما مر به مجرد اوهام ..ولكنها وجدها و بنفس صورة الكاتب الكوميدية ..ولكنه لم تكن كوميدية له هذه المرة ...أنتظر قليلا ثم جاء دوره
رحب به الدكتور محمد كعادته مبتسما مجاملا ....وبعد انتهاء جلسة الليزر المؤلمة ....قال له الدكتور:
معادنا يا ابو حميد بعد شهر ان شاء الله

احمد:
دكتور معلش ممكن اخد من وقت حضرتك 5 دقائق ..انا اسف انا عارف ان حضرتك مش فاضى ...بس فعلا معنديش غير حضرتك ممكن اتكلم معاه و اخد برايه و نصيحته
الدكتور :
طبعا يا احمد اسال زى ما انت ...بس ما طولش ههههههه
ابتسم احمد ابتسامة باهتة ثم قال مسرعا بص يا دكتور تعرف حاجة اسمها تجربة الخروج من الجسد

ظل الدكتور صامتا للحظة ثم قال له:
اكيد قريت عنها...بس انت مالك بالموضوع ده

قص له احمد كل شىء ...وحكى له عن ما مر به امس ......وانه شاهد الشخص بنفس الملابس التى راها به فى الحلم.. ولكن دون ذكر ان الشخص الذى راه اثناء الخروج كان نهال اخته

لم يقاطعه الدكتور محمد طوال حديثه
وانهى احمد كلامه بسؤال:
انا مش عارف يا دكتور اللى انا فيه بجد ولا ايه بالظبط...ساعات بحس انى اتجننت و ساعات بحس انى صح

اعتدل الدكتور فى جلسته وقال له :
اكتر حاجة مضيقانى يا احمد فى الموضوع ده...ان انا عارف دماغك و تعليمك...ومستغرب ازاى حاجة زى كده تشغل تفكيرك بالشكل ده...اومال سيبت ايه للناس البسطاء و الجهلة
صدم احمد من هذا الرد
تابع الدكتور قائلا:
انا زى اخوك الكبير يا احمد وممكن اكون كمان اد والدك...عشان كده ممكن تلاقينى مش بتكلم معاك بدبلوماسية
بس بجد الواحد بيزعل لما يلاقى الامة فى الوضع اللى احنا فيه ده...ولسه مشغولين بحاجات مالناش دخل فيها...ومعرفتها لا هتقدم ولا هتاخر .... انا لحد دلوقتى مش مصدق ان فى ناس بتتصل ببرامج عشان تفسر احلامها ...الناس بره تفكيرهم وحلمهم امكانية الحياة على القمر و المريخ و احنا هنا لسه فى النوم و الاحلام واللحاف
قاطعه احمد فى حرج قائلا:
دكتور حضرتك افهم قصدى...انا عمرى ما قبل كده كنت شاغل بالى بالحاجات دى....وصدقنى انا قريت المقالة دى بالصدفة و اكتر حاجة شادتنى للموضوع ان انا كنت حاسس و عارف ومريت بكل حاجة اتكتبت فى المقالة دى ... وده اللى خلانى اركز فيها

هز الدكتور راسه موفقا وهو يقول:
يا احمد انا مش بتهمك ..ولا بقلل منك....انا كل اللى انا عايزة اقوله انى زعلان ان الموضوع ده شغل تفكيرك اكتر من ما يستحق

احمد:
بس هى بردو حاجة تجننن يا دكتور...مش معقولة الناس تجتمع على التفاصيل دى كلها ...انا كنت بقرا كلام كانى انا اللى كتبه مش حد تانى اللى كتبه
الدكتور :
بص يا احمد ....كل حاجة ليها تفسير علمى ...اه صحيح فى حاجات كتير ..مش بتكون واضحلنا فى بعض الاوقات بس ده مش معناه اننا ننفى اى سبب منطقى ليها ....يعنى زمان ماكنوش يعرفوا ان فى حاجة اسمها كهرباء ..هل معنى كده ان الكهرباء ماكنتش موجودة؟؟؟

احمد :
طب يا دكتور حضرتلك تقدر تقولى تفسير علمى للى حصلى
الدكتور:
طبعا عندى 100 تفسير و تفسير ..بس اهم حاجة انت تقتنع
احمد:
قول يا دكتور و انا هقتنع
الدكتور:
طبعا يا احمد اللى انت فيه ده كان حلم ....بس حلم قوى ...النوم عموما درجات ...كمان لازم تحط فى اعتبارك ان لسه فى اجزاء فى المخ لسه العلم ماكتشفش هى وظايفها ايه
طب بلاش كل ده
انا هديك مثال علمى معترف بيه فى كل العالم
تسمع عن حاجة اسمها شلل النوم؟؟؟
احمد :
لا
الدكتور :
لا اكيد انت تعرفه ومريت بيه زى ما كلنا مرينا بيه ...بس انت ماتعرفش ان اسمه كده... زى كده مثال الكهرباء اللى قولتهولك من شوية ...انت مش كتير تكون نايم و مرة واحدة تصحى ..وتحاول تفتح عنيك وماتعرفش تفتحها...بالرغم من انت مخك صاحى و دارى

احمد :
اه مريت بكده كتير

الدكتور :
اهو ده بالظبط اللى اسمه شلل النوم

REM sleeping....

المخ بيصحى و الجسم كله نايم ...المخ بيدى اوامر للجسم انه يصحى والحسم بيكون فى حاله زى الشلل ومش عارف يستجيب للاوامر دى...فالمخ طبعا من خلال ملايين الذكريات المتخزنة جواه بيعملك عالم حواليك..يعنى يخليك تتخيل انك خلاص صحيت و شفت الاوضة بتاعتك من حواليك كل ده مجرد حلم او تخيل..بس بيكون قوى اوى و بيفرق عن الحلم العادى

قال له احمد :
طب يا دكتور و حكاية انى شفت الشخص بنفس الهدوم اللى شوفتها بيه وانا نايم..

قال له الدكتور :
من خلال كلامك ..واضح ان الشخص ده انت تعرفه ....يعنى اكيد شوفته باللبس ده...ومخك طبعا حفظ شكله....ممكن يكون الموضوع صدفة ...ممكن تكون رؤية ...الرؤية شىء وارد جدا وحاجة معروفة فى اسلامنا

شعر احمد باحباط وكانه كان يريد سماع عكس هذا التفسير
ابتسم الطبيب وقال فى عطف:
انا عارف انك مش مقتنع ...او مقتنع بس مش عاجبك التفسير العلمى ده...اقولك على سر ...انا كمان مش عاجبنى.
فى رايى ان الانسان دايما بيحب يحس ان فى حاجة اقوى منه ....و ان فى حاجات لسه مش عارفها ...شعور المجهول ده بيثير فضولنا و بيكسر حده الحياة المملة اللى احنا عايشنها
طب اقولك على حاجة اخيرة ...
احمد:
اتفضل يا دكتور

الدكتور:
مش كتير بتحصل حاجة او بتشوف حاجة قدامك ...وبتحس ان انت مريت بالحاجة دى قبل كده وعشتها قبل كده

احمد:
اه كتير جدا ...وكذا حد قالى انه بيحصله نفس الموضوع
قال له الدكتور:
وبتحصلى و بتحصل للناس كلها...دى نظرية معروفة اوى و اسمها
(( ديجا فو)) بالفرنساوى...يعنى شوهد من قبل ....عارف بقى لو عرفت التفسير بتاع الموضوع ده ...هتضحك اوى من البساطة بتاعته و هتحس اننا غلابة اوى
احمد فى فضول حقيقى :
ايه تفسيرها يا دكتور ؟؟
قال له الدكتور:
مخك ده عبارة عن فصين ..فص ييمين و فص شمال....لو حصل فى بعض الاوقات ...والدم وصل الفص اليمين قبل الفص الشمال بجزء من الثانية...بيتكرر عندك المشهد و بتحس انك عيشته قبل ..وانت بتكون لسه عايشه من جزء ثانية

كان احمد مبهوتا من بساطة التفسير
ضحك الدكتور وقال:
شوف بقى كم الافلام و القصص اللى اتالفت على الموضوع...ويجلبك البطل انه خارق والناس تروح ما تنمش بليل

شعر احمد بتفاهة الاشياء التى كانت تشغل تفكيره ....
وقام من مجلسه وقال وهو يصافح الدكتور معتذرا:
بجد مش عارف اقولك ايه يا دكتور....أسف انى عطلتك بجد بس لو كنت قعدت مع 100 واحد و حكتلهم عمر ما فى حد كان هيفدنى زى ما حضرتك فدتنى
ابتسم الطبيب وهو يصافحه ويقول له مداعبا :
يا سيدى ولا يهمك...بس انت بس خلى بالك وانت خارج لحد من الزباين اللى مستيين بره يعمل فيك حاجة و انت خارج
ابتسن احمد
وغادر العيادة وهو يشعر بخيبة امل وانه اعطى الامور اكثر من حجمها وتسلل اليه شعور بالكأبة لان الشىء الوحيد الذى كان يعطى تشويق واثارة لحياته ....شىء عاديا جدا ...لا يتعدى كونه مجرد حلم....شعر بان الخروج و التحرر الذى عاش عمره كله يبغاهم...وان الوقت الوحيد للخروج هو لملاقاة المولى عز و جل جلاله

****************
بعد مرور اسبوع
****************

ميس نادية:
ها يا بنات فى حد تانى ناقص ولا نبدا ؟؟؟
نهال:
لا يا ميس احنا كده كلنا موحودين
ميس نادية :
صحيح يا نهال ليه ما جتيش الاحد اللى فات. الحصة كانت مهمة جدا ..سالت عليكى منى على فكرة
نهال:
معلش يا ميس كنت عيانة شوية
ميس نادية:
الف سلامة عليكى ....يلا بنات هنبدا النهاردة ان شاء الله بالقياس الارسطى

تم بحمد الله تعالى
3-10-2008

..............

2008-09-17T01:51:00.008+03:00

بقينا صحاب انا والوحدة

!!!مكتوب علينا ..يظهر سكتنا واحدة

****

هنفضل ماشيين ..بنجرى ورا ظلنا

ولا عمر ما فى يوم ..هيصعب علينا نفسنا

ما قولنا من زمان الحلم مش لنا

مانعيشها كده

اللى لينا ..هو المكتوبلنا

لا يوم بنتامل ولا يوم بنتعلم...ولا حتى بنرحم مرة نفسنا

بجد نستاهل كل اللى بيحصلنا
***

الاحلام بفلوس ..واللى معهوش ما يلزموش

وبلاش ندوس فى شىء مهروس

و نقول ادينا بنتعلم من الدروس

يلا نكنس بايدينا احلامنا.. و نعيش بس ..عل الملموس

عزيزى القارئ هذه ليست الدويقة انها ....؟؟؟

2008-09-12T06:20:00.001+03:00

مكان الاختبارات الطبية لنقابة المحاميين

بدأت رحلة البحث عن العمل الطاحنة والاصطدام بصخرة الواقع

ووسط وعود واهية بان الشغلانة مضمونة وان الرد سيكون خلال عشرة ايام بالكتير

مش بيخلصوا العشر ايام دول

وما بين روتين سمج وعدم الالتزام بالمواعيد المحددة و قرف الموظفين فى التعامل معك

مما يجعلك تسالنفسك حائرا

انهى ذلة اللى مسكنها عليا

بين هذا وذاك

جاء طلب احدى الوظائف ان تكون معك البطاقة النقابية ..

نقابة المحاميين

ولعل الضجة التى حدثت من قرار الفحص الطبى قبل استخراج الكارنيه النقابى ما زالت حاضرة الاذهان

ولكن شتان الفرق بين السمع و ال... التجربة

ومع كل اسف فقد مررت بهذه التجربة :)

بدات يومى بالاستيقاظ مبكرا

على غير العادة اكيد

ووسط سخط داخلى و ارهاق نزلت مسرعة متجهه الى مستشفى الاسعاف كما يطلقون عليها وذهبت الى القسم المخصص باجراء الفحوصات

ووجدت ما

رأيتموه كاننى واقفة فى الدويقة

بدات بدخول احدى تلك الجحور اقصد الغرف التى تروها نصب اعينكم ..ووسط برود وطهق لا ادرى ما سببه تفضل الموظف وتكرم عليا وطالبنى بدفع 31 جنيه او 32

مش فاكرة بصراحة :p

واروح الجحر اقصد الاوضة اللى جنبه

ذهبت مسرعة وتفضلت الموظفة بجعلى اكتب اقرار بانى خالية من اى امراض نفسية

او صرع

او او او

وبعد هذا تفضلت قائلة وقالت لى ان اذهب الى الحجر اقصد الاوضة اللى جنبيها

بتاعة الموظف اللى ادانى الوش الخشب -

دوكها غير دولهما

والذى تفضل مشكورا بطلب 55 جنيه

طب ما كان من الاول يا عم تقولى هاتى 86 جنيه لازم الماشورة يعنى

ودول غير ال 1200 بتوع النقابة

المهم

وبدون دخول فى كثير من التفاصيل لك ان تتخيل عزيزى القارىء

الواقفة فى مكان مثل هذا

وفى درجة حرارة مثل هذه

و فى نهار رمضان

ولعل اكثر الاجزاء اثارة فى هذا اليوم هو

ان كل شىء كان منكشفن وباين وعلى عينك يا تاجر

فبعض التحاليل تكشف ان صاحبها متعاطى بانجو او حشيش و بصوت عال

تتفضل الطبيبة او الموظفة ناصحة للشخص

تعالى بعد 45 يوم من اخر مرة شربت فيها سيجارة او حشيش

طن طن ..ايه ده انا واقفة فى مكان فيه مدمن جاميه عطش الجيم :)

اضف على ذلك روعة الفحوصات التى تخوضها بدا من فحوصات الباطنة اللى على الواقف

مرورا بفحص النظر

واحدة صحبتى قعدت تقوله حاجات غلط بقصد وهو بيعدى الموضوع عادى

وانتهاءا بالفحص النفسى من دكتورة فاضله

هى هى اللى كشفتلى باطنة

والتى تفضلت بسؤالى سؤال عميق لولبى حلازونى كان هو الاختبار النفسى

والقت بالسؤال عليا وبدون مقدمات غير عابئة بحداثة عمرى ولا ببرائتى قائلة

قوليلى يعنى ايه اللى ايده فى المية مش زى اللى ايده فى النار!!

اه والله قالت كده

وتم الاطمئنان على صحتى النفسية والحمد لله بعد الاجابة الرائعة التى قمت بقولها بعد فاصل من الضحك وقامت بتدوين كلمة سليم فى الورقة

صحبتى اللى كانت معايا كان السؤال بتاعها

اللى بيته من ازاز ما يحدش الناس بالطوب ..اشرح

الحمد لله ان الاسئلة كانت جميعا من المقرر..وانتهى اليوم بتحديد جلسة حلف اليمين فى اقرب معاد وهو

شهر 12

لوووووووول ربنا يستر بقى على الشغلانة

ملحوظة اخيرة

تم اختصار كثير من الاجزاء فى بعض للفحوصات منعا للقرف والاشمئزاز

كل عام وانتم بخير
وتقبل الله صيامكم و ركعوكم و سجودكم

كنت فى الحجاز

2008-06-30T03:34:00.003+03:00

المرادى بقى معايا عذر فى غيابى

انا الحمد لله ربنا كرمنى وسافرت عملت عمرة ولسه راجعة انبارح....

يلا بقى ادخلوا بركولى وقولولى عقبال العودة يا حاجة نرمين...

وادعولى ان ربنا يتقبل

اللهم امييييين

تاج من مون الكبير

2008-06-17T05:50:00.001+03:00

تاج جالى من المذكورة اعلاه

من منى صاحبة مدونة مياسة

سلام اسكندراااااااانى جامد اوى

ولو انى شايفة ان بعد هجرى للتدوين و تنفيضى المستمر ليه ماحدش هيهتم اوى

انه يعرف عنى اكتر ويقرا تاج ليا...بس البت منى على الماسنجر خوتانى ...

خدى التاج ..خدى التاج

ادينى خدت التاج

..هديتى

؟؟؟

انبطيتى

؟؟

اموواااااااا:)...ده انتى حبيبى من ايام الجيزة يا مونى

نبدا بسم الله

هواياتي؟

بصى يا حاجة...انا اصلى من ساعة ما ادمنت النت....

وانا تقريبا موقفة كل هواياتى بقت هوايتى البحلقة فى الكمبيوتر طول النهار

بس عموما لو قلنا بصفة عامة الحاجات اللى بعرف اعملها فى حياتى

ارسم

الف قصص

تشجيع ومتابعة الاهلى

القراية

اشهر عيوبي؟

ماتعديش العدد فى اللمون

وربنا حليم ستار

بس عموما ...بجد انا عيوبى كتير اوى

يمكن اشهرها يعنى واللى هو صالح للنشر:ي

انى

مستفزة

كسلانة

فاشلة

يلا كفاية كده عيوب

حاجات بكرها جد؟ا

لما الرسول صلى الله عليه وسلم والاسلام يتهانوا

لما النور او المية يقطعوا

لما النت يفصل

لما الاهلى يخسر

لما اكون مش فاهمة حاجة ومش عارفة افهمها

لما حد يشتغلنى ويفتكر نفسه حدق

حاجات بحبها قوي ومش بمل من تكرارها؟

تشجيع الاهلى

اروح سينيما مع صحابى

سؤال بيستفزني؟

عملتى ايه؟

لما اكون طالعة من الامتحان و حالة وحش:s

بتعملى ايه؟

لما اكون قاعدة على النت

ولما اسكت شوية ...يقوم اللى بتكلم معا يسالنى السؤال ده

ساعات بقى غتاتة بروح سالة بتعمل/بتعملى ايه

مش انتى طبعا يا مون لوووووول

امنيتي في الحياة؟

رضا ربنا سبحانه وتعالى عنى

الاقى الزوج الصالح

(اللى هو يعنى هو نصى التانى لوووول قابلونى على الناصية )

اعمل فلوس كتيرة ..من غير ما حد يساعدنى

حاجات مؤمنة بيها جدا؟

مفيش حاجة/حد(غير اهلك) تستاهل تحرق نفسك عشانها

لا تفسر بالدهاء ما يمكن تفسيره بالغباء

الصناديق الفارغة هى اكثر الصناديق ضجيجا

عشان كده دايما تلاقونى عاملة دوشة :)

اعلمه الرماية كل يوم ... فلما اشتد ساعده رماني

وكم علمته نظم القوافي ::: فلما قال قافية هجاني

اللى هو يعنى اتقى شر من احسنت اليه

سبحان من يغير ولا يتغير

مفيش حاجة فى الدنيا مطلقة

اكتر حاجة فاشلة فيه؟

الطبيخ

اتكلم بالراحة

الرياضة والارقام

اضغط على نفسى فى تحمل حد انا مش طايقاه او مش مستظرفاه

احافظ على نجاح جزئى انا عملته

وظيفة بحبها؟

التمثيل

الاعلام التليفزيونى

الصحافة

لاعيب الكورة بصرف النظر عن انى بنت ههههههه

مثلي الاعلي في الحياة؟

الرسول صلى الله عليه وسلم

مفيش حد واخداه مثل اعلى

بس ممكن اكون واخدة صفات فى كل شخص وواخداه مثلى الاعلى فى الصفة دى

زى

ثقافة ابراهيم عيسى

خفة دم بلال فضل

هدوء و نظام احمد المسلمانى

كاريزما حسن نصر الله

شجاعة احمدى نجاد

رصانة حمدى قنديل

شمولية الممثلة بشرى

ذكاء الممثلة هند صبرى

نجاح عمرو خالد

بساطة خالد الجندى

الثغرات اللى بيلاقيها مرتضى منصور:)

اجتهاد عمرو دياب

اصرار المطربة شيرين

اخلاق ابو تريكة

حكمة وسرعة بديهة الاكسلانس

"ده عضو فى منتدى كوورة ...مش عاتق حد من الاعضاء..كلامه دايما بيكون بالدليل.."

وبيبقى فى الجووون...كلامه بيوزن الدماغ فعلا

بهدي التاج ل

ايه ده قوام كده خلص...انا اتكروت:(

بهدى التاج لاى حد يخش هنا ويقراه

ميرسى يا مونى

انا اتخرجت يا مينززززززززز

2008-05-27T11:29:00.003+03:00

يا جماعة يا جماعة يا جماعة

انا خلصت

انا خلصت خالص...انا عارفة انى اخدت الاجازة بدرى مع كى جى تو...بس نعمل ايه اهى كليننا كده

لولولولولولولولولولولولولى

انا كده خلاص محامية :ي .... ان شاء الله مع افتراض انى هعدى صافى:(

كل واحد يدخل يزغرط بليز ...ويقولى مبروك يا متر...ودعيلى انى انجح صافى

بالنسبة للبيبسى والجاتو والحاجات دى..لما النتجية تطلع...مش تكلوا بلوشى و بعدين النتجية تطلع

:(((((((

تــــــــمرد

2008-04-20T02:36:00.000+03:00

انا داخلة ومش عارفة هكتب ايه بالظبط ..بس هكتب اللى يطلع و خلاص

انا حاسة ان جوايا طاقة غيظ و خنقة...وبقيت لما بصدق اخش فى جدل او مناقرة او خناق مع حد

..عندى تحفز رهيب معرفش جبت الحاجات دى منين

انا حتى فى التدريب العملى بتاع السكشن على المحكمة....وقفت قلت المرافعة عمالة احرك فى ايدى وكان صوتى بيجلجل فى الروم...يمكن الولاد كانوا بيتكملوا برقة وصوت واطى اكتر منى

لدرجة الدكتور قالى ده

!!ده انتى هتتخانقى مع جوزك خناق

وعلى الرغم من الطاقة الرهيبة اللى جوايا دى

الا انى بقيت كسلانة جدا

عندى حالة من الزهق والملل...بقى لما التليفون يرن ..بدعى ربنا انو ما يكنش ليا ....عشان ماليش نفس ارغى...والمذاكرة طبعا دى الزغلول الكبير...امتحاناتى يوم 13/5 ان شاء الله....ولسه بفتح فى المناهج بشوفها بتتكلم عن ايه

انا بدات احس بتحسن شوية الحمد لله...بس انا ما زلت

حاسة انى تايهة ومش عارفة عايزة ايه

و عايشة اليوم بيومه كده

حاسة انى فاضية وفارغة ...واحدة عايشة بتاكل وتشرب و تنام وبس

ع العموم بعتذر عن انقطاعى عن زيارات صحابى اللى كنت بتابع مدوناتهم...بقالى فترة ما بقتش حتى بحب اروح ازور حد فى مدونته...عشان ماحسش باحباط....كنت فى الاول لما بفتح ايميلى والاقى رسالة كومنت جاتلى بفرح اوى...جت عليا فترة بقيت مش عايزة حتى اقرا كومنت عشان ماحسش بتقصيرى ناحية البلوج واحس بعجزى اكتر

يوم عيد ميلاد البلوج...عصرت على نفسى لمووووووون عشان اكتب البوست

بجد ميرسى لكل اللى زارنى وسأل عنى

ملحوظة

انا عارفة ان البوست ملغبط وكتابته مش حلوة وافكارة داخلة فى بعضها

عيد ميلاد توهـــــــان

2008-03-06T05:01:00.002+03:00

عدت سنة كاملة على المدونة بتاعتى

يااااه

الوقت بيجرى بسرعة يا ولاد:)

انا فاكرة اول حاجة معرفة ليا للتدوين كانت فى صيف 2006

لما قريت عن مدونة منال و علاء فى جرايد المعارضة

وكنت بدخل مبهورة بقى وفاتحة بؤى زى نفق شبرا

وااااااو

اخبار مظاهرات و ناس بتجادل فى بعضها

وبعدين ابتدى الواو ده و الانبهار يروحوا وابدا اتخنق

من الشتايم و التخبيط فى حاجات ماينفعش التخبيط فيها

وبعدين ابتديت اتشد للتعليقات اللى كانت محطوطة هناك..وادخل مدونات صحابها

بقيت بدخل على منال وعلاء بس عشان اخش على اللينكات دى..وجمعت فعلا لينكات المدونات عندى...وبقيت بتابعها على طول....الليل كله كنت بقضيه قراية...

شهوووور وانا شغالة قراية

وكانت البت my hopes صحبتى تكون قاعدة معايا على الماسنجر....وتلاقينى مخروسة مش بتكلم..تقولى بتهببى ايه

اقولها بهيم على وجهى فى المدونات

المهم فضلت على الحال ده

لحد اليوم الموعود اللى 3-6

كنت فى مدونة دماغى....بتاعة محمد حمدى

كان كاتب قصة حلوة اوى اوى

اسمها حدث فى محطة الرمل

وكان مقسمها على حلقات

واخر حلقت انا قرتها اليوم ده

ومن كتر اعجابى بالقصة ..خلانى اخد القرار اللى كنت باجله من ساعة مع ابتديت اتعلق بالمدونات

وقمت عاملة المدونة دى

ولما جيت بعملها

وقدام خانة الاسم...قعدت افكر كده شوية وبعدين

لاقيت نفسى بكتب توهان

لدرجة انى قعدت افكر ...انا ايه اللى خلانى اكتب كده...لتكون فى مدونة تانية اسمها كده ومعلقة فى دماغى..

بس مع الوقت عرفت ان توهان ده انسب تعبير يوصفنى

طبعا...كنت فى الاول داخلة متحمسة و كده

ولما كان بيجيلى تعليق بفرح اوى اوى اوى

انا فاكرة اول تعليق جالى انا هيجرالى حاجة..كنت عاملة زى فؤاد المهندس

الله يرحمه...لما المكنة طلعت قماش:ي

مع الوقت بقى ابتديت اكسل كالعادة

يلا بقى كفاية رغى كده عليكو

وكويس انكو استحملتونى لحد دلوقتى:)

يا ريت اللى يدخل ويقرا الكلام ده ويتكرم ويعلق....يكتب رايه فى المدونة ..

سواء حلو او وحش

مش بزعل....ولو كان متابعنى من الاول..يكتب اكتر بوست عجبه

واكتر بوست ماكنش عجبه

ده كان اول بوست ليا بالتعليق الوحيد اللى جالى

بسم الله الرحمن الرحيم و هنبدا الليلة :ي
طبعا بما ان انا بس اللى موجودة دلوقتى فى حفل افتتاح مدونتى الجديدة...فاحب اقول لنفسى الف الف مبروك يا نرمو (نرمو اللى هى انا )..وبما ان انا الحاضرة الوحيدة..فانا بتعهد قدام نفسى ان البلوج ده هيكون منبر (حلوة منبر دى:ي)لاى حد تايه ونفسه يلاقى حتة يتوه فيها اكتر..وبما اننا فى عصر الديموقراطية واهو خلاص على وشك العبور البوابة بتاعة المستقبل فاى حد نفسه يقول حاجة ...حتى لو كانت بتنتقدنى انا سخصيا:ي يقولها ورزقه على الله... بس اهم حاجة ان النقد مايتجاوزش حدود الادب يعنى من غير شتيمة (ضرب بس:ح)......هذا واقول قولى واستغفر الله لى ولكم و السلام عليكم ورحمة الله وبركاته

"تصفيق حاد"

Posted by NeRmeeN at 6:35 PM
Labels: حصريا"حفل افتتاح مدونة توهان"لايفوتك :ي

اصرار أمل said...
نورت التدوين ...... والنت كله يانرمين ......نأمل أن نرى قريبا ابداعا......مبروك ؛ وربنا يجعلها فى ميزان حسناتك .........
March 8, 2007 1:43 AM

كلام وعجبنى

2008-01-24T06:40:00.000+03:00

فى العدد الاسبوعى بتاع الدستور...فى شعر عجبنى اوى

ل على سلامة

كان بيتكلم ان ساعات الحاجات اللى واحد بيتمنى انها تجيله و يحققها...وبيكون مستنيها بفارغ الصبر لحد ما تجيله...بس بتكون جاية متأخرة اوى...وتكون خلاص مش هتفيده

طبعا لو علمتم الغيب لرضيتم بالواقع

بس عموما انا حبيت اجبلكوا المقاطع اللى عجبتنى

الشعر بعنوان تقاسيم ع العود

لما كنت شاعر...

كان كل الغونا حزين..

ولما بقيت عصفور..

كيترو الصيادين..

ماعرفش انا ابقى مين..

طب اعمل ايه..

ايه ايه..

*****

لما كنت حلو ..

ماكنش عندى كاميرا..

وقلت قشطة يا أبيض..

حبيبتى واحدة سمرة..

طب أعمل ايه..

ايه ايه..

*****

لما كنت أسد..

ماكنش فيه غابة..

ولما بقيت مفترى..

مبقاش فيه غلابة..

وعلى ما اكتشفت النبلة..

كانوا اخترعوا الدبابة..

طب أعمل ايه..

ايه ايه..

*****

لما كنت قط..

ماكنش فيه فيران..

ولما كنت حرامى..

كان كل البلد جدعان..

وعلى ما أفتكرت انى مصرى..

كان بقى اللى كان..

وأنا اعمل ايه

*******************

صحيح يا جماعة بمناسبة معرض الكتاب

يا ريت كل واحد يعلق يرشحلى اسامى روايات كويسة ممكن اشتريها...بليز ساعدونى فى الموضوع ده..مش عايزة اشترى روايات و تطلع مقلب

عايزة كده روايات جامدةةةة

وبردو ابقوا قولوا على اسامى كتب كويسة الثقافة حلوة برده...بس الاولوية للروايات

وابعدولى بقى عن الحاجات المشهورة زى السميائى وثلاثية غرناطة و شكلها باظت والحاجات دى خلاص قرتهم...بس يا ريت تقولوا حاجات فى نفس قوتهم

حصريا سبب خروج الأهلى من الكاس

2008-01-22T17:12:00.000+03:00

سبب هزيمة الاهلى

غير

طبعا عدم التوفيق من الله سبحانه وتعالى

وغير

ان النجوم ماكانوش موجودين عشان المنتخب

وغير

ان الفريق التانى للاهلى مش جاهز

وغير كل حاجة

انا جاية اقولكوا على السبب الخفى

وهو

الadministrative law

القانون الادارى

يا جدعان ما هو الحاجة لو حصلت مرة تبقى صدفة

لو مرتين بردو ممكن تبقى صدقة انما تلت مراااااات

ده اللى كتيييييير

كل ما يكون عندى نيلة المادة دى

الاهلى يخسرررررر

وبيخسر فى كوارث

احكلكوا بالتفصيل

السنة اللى فاتت لما الاهلى كان راجع من اليابان....وكان هيعلب ماتش مع الاسماعيلى....كان اليوم ده ليلة امتحان القانون الادارى عندى...

طبعا بالنسبالى ...الامتحان ولا الاهلى

بدون تردد هقول

الاهلى طبعا

عشان كده تلاقونى متفوقة اوى

قعدت مجوعة نفسى طول اليوم وقلت هبقى اتغدى قدام الماتش عشان ماضيعش وقت

المادة بردو كانت 3 كتب طويلة يعنى

ولله الحمد الاهلى لعب

وخسرنا من الاسماعيلى 3-0فى ستاد القاهرة

خدت الصدمة وروحت تنحت قدام الكتاب

دى كانت اول حاجة

تانى حاجة

ودى لسه طازة

هزيمة الاهلى قدام النجم الساحلى:(

على ارضنا:(

فى وسط جمهورنا

كنت وقتها فى امتحانات الميد تيرم وكان عندى نيلة administrative law

وأخدت الصدمة

وقلت يا واد طنش خاااااالص

اما بقى اخر حاجة وهى كانت خروج الاهلى من الكاس..اليوم ده كان عندى بردو administrative law شوفوا الصدف ..وعملت فيه زى النيلة..

وهى من المواد المرشحة وبقوة انها تتشال:(

طب يا جدعان قولولى اعمل ايييييييه انا اتعقدت و كرهت القانون و وكرهت الادارى

عااااااااااااا

بس ماتخافوش....انا المادة دى مش هاخدها تانى ان شاء الله....انا خلاص فى اخر السنة..ادعولى بس انتو انى اتخرج وانى ماشلهاش...والا انتو اللى هتدفعو التمن

انا بس حسيت من الواجب عليا انى اقولكوا

*******************

صحيح

بمناسبة ان الواحد اخد الاجازة

...شعور الواحد بالاجازة لا يوصف...مفيش تطبيق... مفيش سهر...مفيش نسكافيه...مفيش تنشين..مفيش دروس و مراجعات نهائية.....مفيش اى حاجة

غير

نوم ولعب ونت ومنتخب:ي

عــــيد ميلاده الليلة مين..عـــ ميلاد النونة ــــد

2007-12-28T03:11:00.000+03:00

عاااااااااا النهاردة عيد ميلادى

انا حاسة انى كبرت اوى :(

بقى عندى21 سنة بحالهم

انا عارفة ان ممكن حد يشوف السن عادى

لكن انا حاسة انو كتير:(

انا مش عايزة اكبر:((

انا فاكرة انى من ساعة عيد ميلادى اللى تميت فيه

9 سنين ..وانا مش عاجبنى موضوع الرقم اللى عمال يزيد ده :(

يلا بقى الحمد لله

كمان ولله الحمد انا مولودة فى ايام عسل

28/12

يعنى صباح الامتحانات

دايما يكون ليلة امتحان او يوم امتحان

نفسى احتفل بعيد ميلادى

يلا بقى فى عيد ميلادى ال22 ان شاء الله

:( عشان اكون اتخرجت

واكون متر اد الدنيا والمهم انى بالسن ده

اكتملت اهليتى القانونية ..واستطيع ابرام كافة التصرفات القانونية دون ان يطعن احد فيها بالبطلان...هع هع هع

طبعا يا جماعة الهدايا والذى منه تتساب وانتو داخلين ..مش نظام بقى كل سنة وانتى طيبة حاف كده و خلاص..

هتبقوا انتو والسن عليا :(
********************
بجد بعتذر جدا جدا جدا جدا كالعادة عن انقطاعى الطويييييل عن التدوين ..كان فى الاول فعلا عندى امتحانات ميد تيرم ومش فاضية..وبعد ما خلصت امتحانات كنت كسلانة جدا جدا جدا اعمل اى حاجة..وبعدين حصل ظروف كده...بقيت بسببها مش عارفة ادخل النت كتير..وهو دلوقتى امتحانات نص السنة هتبدا 1/1:ي

ان شاء الله

.بس عموما احب اوجه شكر خاص جدا جدا جدا للناس دى اللى سالوا عليا وافتكرونى
my hopes
sendbad

angelic devil

احساس لسه حى

كفراوى

شاب نفسه يحقق حلمه

mohand

H@PPY B!RTHD@Y 2 ME

ظـــــــلال الماضى

2007-11-02T02:17:00.000+03:00

************************************
المكان: شقة الدكتور محمد سعيد صالح - الصالون

الزمان:6/7/2006
***********************************
هشام : مريم انا عايز اقولك...انى بجد على الرغم الفترة اللى عرفنا بعض فيها تعتبر قصيرة...مانا يادوب اتقدمت من شهرين بس...لكن بجد حاسس انى عارفك من زمان اوى...فعلا عمرى ما كنت اتصور ان ممكن جواز الصالونات يعمل حب كده

ابتسمت مريم فى حياء وقالت له:

ايه الكلام الحلو ده كله

هشام فى اخلاص: بجد يا مريم ....اللى بحسه معاكى غير اى احساس حسيته مع اى حد تانى فى حياتى

مريم فى رقة : وانا كمان

انتبه هشام و اعتدل فى جلسته: هو ايه اللى وانا كمان؟؟

قالت مريم فى ابتسامة مرتبكة: يعنى الاحساس اللى حسيته معاك ..غير اى احساس تانى

قال لها هشام فى سخرية غاضبة: اه وهو كان فيه احاااااسيس تانية؟

اعتدلت مريم وقالت : يعنى ايام هبل الجامعة و كده بس صدقنى خلا...

قاطعها وقال لها: استنى استنى ...تصدقى انى اول مرة اسمع عن حوار هبل الجامعة و هطل الجامعة ده

بدأت مريم فى التوتر وقالت : هشام فيه ايه مالك؟؟؟ دى حاجة فات عليها أكتر من 3 سنين ....عادى يعنى زى اى بنت ...اكيد حسيت بميل ناحية حد

قاطعها فى سرعة قاله لها: اى بنت ازاى؟؟؟حددى...بنت محترمة ولا ...؟؟؟

قاطعته فى حدة: هشام تقصد ايه؟؟
اطلق هشام ضحكة عصبية : ههههه لا لا ماقصدش حاجة ....هو انا فتحت بؤى

حاولت ان تمنع نفسها من البكاء وقالت فى تماسك: هشام صدقنى ده موضوع اهبل اوى ....قعد شهور بس .. كنت وقتها فى فى تالتة كلية ...وصدقنى الموضوع ماتعداش سور الكلية ...لا خروج لوحدنا ولا كلام ده...وحسينا بعد كده اننا مختلفين فى حاجات كتير و ...

قاطعها فى هدوء حازم قائلا: انتى بتحكيلى الحواديت دى دلوقتى ليه؟؟؟ النتيجة واحدة يا انسة....انك صاحبتى قبل كده و خلاص

قالت مريم فى ذهول: صاحبت!!!

رد عليها فى سرعة : قوليلى مسمى تانى

بدات دموع مريم تتساقط رغما عنها وقالت: هشام انت مش عارف كلامك جارح اد ايه

التقط هشام انفاسه فى عمق و صمت برهة ثم قال: وانتى مش عارفة انا دلوقتى جوايا ايه

ثم استطرد قائلا: مريم انا لازم امشى دلوقتى

التفتت اليه فى هلع وقالت: هشام انت رايح فين...استنى

رد عليها هشام وهو يكاد يبلغ باب الشقة: معلش مخنوق شوية....سلام

ظلت مريم واقفة مبهوتة فى وسط الردهة دون ان يصدر عنها اى تعبير

" ايه ده يا مريم هو هشام مشى ؟؟؟"

التقطت مريم انفاسها فى عمق وحاولت ان تبدو طبيعية وقالت:

اه يا ماما...اصله عايز ينام ومش قادر يقعد ...عشان صاحى من بدرى

- يمشى كده من غير ما يسلم على حد...اوعو تكونوا اتخنقتوا يا مريم

- لا لا يا ماما اتخنقنا ايه....ده انا كمان بردو كنت بنام على نفسى وانا قاعدة معاه...انا كمان هروح انام عشان الشغل بكرة ان شاء الله

قالتها مريم و اتجهت لغرفتها على الفور و ظلت محملقة فى فراغ الغرفة و دموعها تتساقط بهدوء ..ظلت هكذا مدة طويلة ...تعيد حسابتها

قطع تفكيرها صوت هاتفها المحمول ...هرعت اليه على الفور ...كانت تعلم ان هذه هى نغمة هشام ..كاد قلبها يرقص فرحا ...وقالت فى نفسها :
كنت عارفة انو اكيد هيكبر دماغه...هشام مش ممكن يستغنى عنى

فتحت الهاتف و بكل لهفة الدنيا
هشاام
ايوه يا مريم

ازززيك...لحقت توصل
- الحمد لله
صمت قليلا ...ثم قال فى اقتضاب

ازيك
صدمها صوته البارد وقالت فى صوت مبحوح
الحححمد لله

بقولك عايزك اون لاين دلوقتى

ليه فى حاجة

ادخلى بس

ليه يا هشام؟؟ ..من امتى انا وانت لما بنحب نقول لبعضنا حاجة بنقولها على النت ...ما تقولى هنا و خ...
مريم لو سمحتى ادخلى النت دلوقتى

قالت مريم وهى تجد صعوبة فى خروج الكلمات من شفتيها:
اوك

اتجهت نحو جهازها فى بطىء...وانتابها ذلك الشعور بالغثيان الذى ينتاب المرء عندما يكون مقبلا على امتحان

Hesham_74 :هاى
ReMoZ: كنت عايزنى فى ايييه؟

صمت

Hesham_74 : بصى يا مريم ...انا عمال افكر من ساعة ماسيبتك ...وبجد دماغى خلاص ..قربت اتجنن

صمت

Hesham_74:بصى يا مريم... انتى انسانة طيبة و بجد رقيقة و قلبك طيب و.

Hesham_74 is typing a message

ReMoZ: هشام يا ريت تدخل فى الموضوع على طول
Hesham_74 : اوك
Hesham_74: مريم احنا ماينفعش نكمل مع بعض ...انا عارف اننا اتعلقنا ببعض...بس صدقينى مش هينفع...مش هعرف اسعدك

ReMoZ: خلاص يا هشام انا مش محتاجة منك اعتذارات عشان شعورك انك مش عايز تكمل معايا ....بس كل اللى انا طلباه منك ..اسباب تخلى القرار ده يطلع منك فى ساعة واحدة بس

Hesham_74: انتى عارفة السبب

ReMoZ: لا مش عارفة

Hesham_74: اوك يا مريم طالما انتى بتلاوعى كده يبقى اقولك عشان الانسة المحترمة بنت الناس اللى انا جيت اخطبها بناء على سمعتها الكويسة و سمعة ابوها...طلعت مصاحبة واحد قبلى ...وياعالم كام واحد قبله و ...

بدات دموع مريم تنهار ووجدت يداها تكتب فى سرعة :
هشام خلاص ارجوك كفاية ...الله يسامحك بجد

Hesham_74: انتى اللى اضطرتينى لكده يا مريم

ReMoZ: خلاص يا هشام ..خلاص

Hesham_74: انا طبعا مش عارف هقول ايه لباباكى

ReMoZ: لا تقول ولا تعيد ...انا هخترعله اى حكاية ..هقول اننا ماتقناش و اختلفنا و خلاص...ماتشلش انت همى....وميرسى اوى على كل حاجة

Hesham_74: قولى اى حاجة ...ماتخافيش انا مش هجبله سيرة..مش هجيب اى سيرة على الموضوع

ReMoZ:سيييييييرة ايه انت صدقت نفسك ولا ايه ....انت فاكرنى ايه..ماتقول اللى انت عايزه ...تصدق الحمد لله ان كل واحد عرف دماغ التانى بدرى بدرى

Hesham_74: اه فعلا

Hesham_74: يلا خدى بالك من نفسك يا مريم ....سلام

Hesham_74 is now offline

ظلت مريم محملقة فى الشاشة ...غير مصدقة ان كل شىء قد انتهى بهذه البساطة....ثم انفجرت دموعها كشلالات متدفقة...واخذت تردد وسط دموعها ...حسبى الله و نعم الوكيل

**********************

سلامو عليكو ازيك يا طنط

وعليكم السلام ورحمة الله ازيك يا داليا يا حبيبتى

ايه طنط مريم مالها مش بترد على الموبايل ليه ...وماجتش الشغل بقالها 3 ايام

يعنى يا داليا مش عارفة اقولك ايه ...بصى انتى مش غريبة بقى ...موضوع هشام اتفشكل و باظ

لييييه يا طنط

معرفش يا بنتى ...انا مش عارفة مالها ...ما كانوا كويسين والواد كان كويس و ماشوفناش منه حاجة وحشة الحق يتقال...هى مرة واحدة كده
دخلت لابوها ...انها خلاص مش عايزاه ...وانها حست انهم مش متفقين مع بعض فى حاجات كتير....وانها خلاص قالت انهت الموضوع مع هشام و انفصلوا

ايه ده يا طنط مش ممكن

والله يا بنتى زى ما بقولك ...ده ابوها زعلان منها اوى...وقالها انها ولا عملاله اعتبار...وقعد يزعق ويقول بقى بعد ما الواد طالع نازل عندنا و الناس شايفينه داخل علينا كل يوم والتانى وهى تنهى الموضوع بالسهولة دى

معلش يا طنط كل شىء بقى قسمة و نصيب ....و الحمد لله ان ماكنش لسه فيه خطوبة رسمى او اشهار لاى حاجة

يلا الحمد لله يا بنتى...هى عين و صابت....الست اللى قدامنا دى ربنا يسامحها..مش سايبة حد فى حاله هى اللى ارت على بنتى ...يلا بقى استغفر الله العظيم...ادخللها يا داليا بالله عليكى ....انا مش عارفة البت دى مال بختها عامل كده ليه؟؟؟ ...دى هارية نفسها من العياط ..طب طالما عايزاه سابته ليه؟؟؟

طب يا طنط انا هدخلها
***************

فور ما ان دخلت داليا و اغلقت الباب خلفها...هرعت مريم اليها والقت بنفسها فى احضانها واجهشت فى بكاء حار
دمعت عينا داليا واخذت تربت على ظهر مريم الملتهب من كثرة البكاء

انا موجوعة اوى يا داليا... اوى

طب احكيلى بس فى ايه ...حصل ايه

قصت لها مريم كل ماحدث....لم تقاطعها داليا قط ...وظل وجهها بدون تعبيرات واضحة .
وبعد ما ان انتهت مريم قالت داليا فى هدوء: طب ما انتى طبعا غلطانة يا مريم

مريم فى دفاع: هو انتى كمان هتقوليلى غلطانة يا ناس دى كانت حاجة و عدت ووقتها ماكنتش لسه ملتزمة اوى و صدقينى ما حصلش اى حاجة تسيئ ليا او...

قاطعتها داليا فى استخفاف : مش بتكلم على كده يا هابلة

صمتت مريم للحظة ثم قالت: اومال قصدك ايه؟؟

قالت داليا : انتى فعلا هابلة ...بقى فى الذمة حد يعمل اللى انتى عمليته ده...موضوع و خلص ليه تفتحيه

قاطعتها مريم: يا بنتى مافتحتوش من نفسى ...ده كان من ضمن كلام عادى..وبعدين ماهو لازم يعرف كل حاجة عنى

هزت داليا كتفيها قائلة : ويعرف ليه ؟؟..هو انتى عملتى حاجة يعنى تسيء ليكى او ليه ...يا بنتى الحاجات دى ماتتحكيش خالصصص

قالت مريم فى حيرة : داليا انا مقدرش اكون فى حياتى تجربة قبل كده ...واعمل قدامه كأن مفيش حاجة ....انا الشخص نفسه مش فاكراه ومش هاممنى...لكن كان لازم يعرف انى قبل كده مريت بتجربة زى كده

قاطعتها داليا: ماتبطلى يا بنتى بقى كلام الافلام و المسلسلات ده...مفيش دلوقتى حد خصوصا اللى بيتجوزا صالونات بيقبل كده ... يكونوا صايعين ولافين بره ..و بعدين يقول انا هروح اتجوز واحدة تربيلى العيال و تشيل اسمى ...بيكون فاكرها جاية من ورا الجاموسة ...وانه سوبر مان حياتها

مريم فى حزن : مقدرش يا داليا ماكنتش اقوله...انا اصلا كان ضميرى وجعنى انى ما قولتلوش بالرغم انى بعتبره موضوع تافه.. بس فى الاخر اتفقت مع نفسى انى هستنى اى فرصة يتفتح فيها الموضوع و اقوله الموضوع فى وسط الكلام

قالت داليا فى سخرية: تمويه يعنى ...وهو يختى التمويه جه على دماغك...اشربى بقى

بدات دموع داليا تتساقط وهى تقول: انا اتعلقت بيه و اتعودت عليه اوى...كنت بدات احس اننا خلاص بقينا واحد ..وحسيت ان كل الحواجز بينا راحت ...وعشان اريح ضميرى ناحيته قوللته

قاطعتها داليا مستنكرة : ضمير ايه يا بنتى

ثم اعتدلت فى جسلتها وقالت فى هدوء واثق: انا عندك اهو....اعترف انى عرفت كتير فى فترة الكلية ...بس بعد كده ربنا هدانى و بطلت اصاحب و باعتلى حب عمرى احمد ....وانا عرفت اقدر النعمة اللى فى ايدى دى ...وماقعدتش احكيله فى حكايات احنا فى غنى عنها....واديكى شايفة اهو ربنا عالم ....انى من ساعة ما عرفت احمد وانا عينى دى مش بتحود بس كده تبص على اى واحد تانى ...و لو حصل واى حد جه كلمنى...ماببقاش شايفة حد قدامى....والموضوع ده مش مؤقت ...اديكى شايفة انا وهو اهو اتخطبنا سنة و وكاتبين كتبانا بقالنا 6 شهور ..ومخلصاله جدا وماوقعتش بلسانى زى ما انتى اتوكستى كده

سالتها مريم: يعنى عايزة تقنيعينى ان احمد ما سألكيش على أى تجربة ليكى قبل ما تعرفيه؟؟؟

ردت داليا فى سرعة: طبعا سألنى....قلتله انى عمرى ما صاحبت و كده ...وان كان كل علاقاتى فى الكلية كانت زمالة و بس...بس معجبينى كانوا كتير و ان انا كنت بنفضلهم ههههه

ضحكت مريم فى سخرية وقالت فى مرارة: يا سلام على التحوير

قالت لها داليا فى شرود: بصى يا مريم لو عايزة تعيشى لازم تتكيفى مع الواقع اللى انتى فيه...الولاد بيحاولوا يقنعونا انهم بقوا متحضرين و بتاع وانهم مؤمنين بالمساواة والبنت زى الولد و كده...لكن صدقينى كل واحد فيهم لما بيجى يتجوز بيرجع 60 سنة لورا ...لسه نظرية انا ولد الف وادور و اعمل اللى انا عايزه لكن البنت ماينفعش تعمل اى حاجة...دى جينات يا بنتى وافكار مترسخة فى دماغهم بيتولدوا بيها ...انا ما قولتش ان الصحوبية حاجة صح ...غلط ماشى على عينى وراسى ...لكن معلش غلط على الاتنين... ولد و بنت.

نظرت اليها مريم فى يأس وقالت: يعنى يا اختار ...يا اكون كدابة فى نظر نفسى و محترمة قدامه
يا اما ابقى صادقة مع نفسى وفى نظره ابقى لفيت ودورت

قالت لها داليا فى لامبالاة : حاجة زى كده

"نقول ايه خلاص انا وانت حبيبى مفيش حاجة نقولها...واصلين لدرجة حب مفيش حد وصلها...انا ليك و......"

انطلقت تلك النغمة من موبايل داليا ...التقطته على الفور ....وهمست لمريم فى نشوة:
ده أحمد
ورأت مريم عينا داليا التمعت ووجدت الأخيرة تقول فى دلال مصطنع: ايوه يا ميدو....ازيك ...طب بجد بجد وحشتنى....هههههههه ماشى لما اشوفك بس ....هههه بس بقى مش وقت الكلام ده....ماشى يا حبيبى ...لا هرجع على طول ....يوه بقى عليك...مانا قولتلك انى هعدى على مريم ...مش هتاخر متخفش ....طب خلاص النهاردة ان شاء الله....وانت كماااااان ....ههه اوك سلام

شعرت مريم بنار الغيرة تكوى قلبها ....قاومت شعورها وحاولت ان تبدو طبيعية ... نهضت داليا وقالت وهى تغلق حقيبتها: بصى يا ريمو ...انا لازم امشى دلوقتى...عشان احمد هيجى النهاردة ان شاء الله يسهر عندنا ...ولازم ارجع اوضب البيت و كده و احضر الاكل مع ماما...
ماتزعليش نفسك يا مريوما...بكرة ان شاء الله هيجيلك اللى احسن منه...انتى بس اسمعى كلامى

طبعت قبلة على رأس مريم وقالت وهى تغادر: هبقى اكلمك بليل ان شاء الله بعد ما احمد يمشى

********************************
المكان :منزل الدكتور محمد سعيد صالح- الصالون
الزمان: 25/5/2007
*********************************
*ههههههههههه مش قادرة يا مصطفى كفااااية همووووووووت من الضحك حرام عليك بجد كفاية

-يا بنتى اومال لو كنتى حاضرة الموقف كنتى هتقولى ايه ...ده كنت قاعد هتشل....البت كانت حطالى صورة مش عارف مين على النت..ولما قابلتها....حسيت انى بقابل واحد صحبى...ههههههه..كنت قاعد معاها زى اللى قاعد فى تاكسى مافتحتش بؤى بكلمة...وقاعد مستنيها تقوم...يلا بقى كانت ايام الشقاوة...ربنا هدانى الحمد لله

*هههههه مسخخخرة

-اى خودعة يا فندم
ثم نظر اليها فى حب وقال :واحنا نطول اننا نبسط سيادتك

ابتسمت مريم فى خجل : انت مش بتعرف تتكلم جد ابدا

يا ستى واقلبها جد ليه ...ما احلى التهيس....بس عارفة على اد مانا كده ...على اد مانا لما بتربس بتربسسسس ...فى حاجات معينة بقفش فيها

نظرت اليه مريم فى تردد وقالت فى حذر : خير و حضرتك بتقفش فى ايه بالظبط عشان نبقى نتجنبه

ابتسم وقال فى رومانسية: يا روما انتى أحلى حاجة حصلتلى..حاجة بيور كده و جميلة ...مش ممكن اقفش عليكى ابدا ...اى حاجة بتضايقنى أكيد مش فيكى

قالت مريم فى مرح مصنطنع : وايه بقى الحاجات اللى مش فيا ...عشان اروح اشكرها ...انها خلتنى انول الشرف ده

نظر اليها وقال : اول حاجة النفاق...الناس اللى بوشين دول ...بيدخلوا فى البلاك ليست عندى

تنفست الصعداء فى داخلها وقالت فى ارتياح : وتانى حاجة؟

رد عليها فى سرعة : الكدب ..
اللى بيكذب عليا فى حاجة حتى لو فى حاجة صغيرة اوى ...بيقع من نظرى على طوله
مهما كان غالى عليا ...والموضوع ده خسرت بسببه صحاب كتير و .....

لم تسمع مريم بقية الكلام فقد ذهب ذهنها بعيدا و اعتصر الالم قلبها بلارحمة و شعرت ان لعنة الماضى ما زالت تطاردها....شعرت بغصة فى حلقها ...وتذكرت ثانى لقاء بينها و بين مصطفى وكانت اول جلسة لهم بمفردهم بعد أن تقدم لها وكانت لم تعتد على الكلام معه بعد ....وسالها وقتها سؤال واضح و صريح :
مريم لو عندك اى حاجة عايزة تقوليها قوليها ....اى حاجة انتى شايفة انها لازم تتقال ماتخبيش عنى حاجة ..انا بحب الصراحة فى كل حاجة

شجعها سؤاله المبهم على تجاهل الرد بصدق على سؤاله وقالت لنفسها:
هو ما سالنيش بشكل مباشر ...يبقى مفيش داعى احكيله...كده يبقى مش كدب

رغم علمها بما يرمى اليه سؤاله

" مريم انتى روحتى فين"
قطع صوت مصطفى حبل أفكارها
*هه.... اه سورى يا مصطفى سرحت مش عارفة مرة واحدة

قال فى غضب مصطنع: فى مين هانم ؟؟انطقى
وبدأ يلوح بقبضته وكأنه سيضربها

نهضت مريم وقالت فى مرح مصطنع: مفيش فايدة فيك ...على طول قالبها مراجيح ...ان شاء الله هنخلف قرود ونسانيس لما نتجوز

تشرب عصير؟؟

*******************************
المكان : منزل المهندس مصطفى محمود على
الزمان : 20-11-2008
******************************
*مصطفىىىى يا مصطفى

-ايوه يا مريم ايه الغارة اللى انتى عملاها دى

*بنده عليك بقالى ساعة مش بترد
-يا شيخة...بقى بقالك ساعة بتنادى ...ايه الفشر ده

*هههه اهو ده اللى بخده منك ...كنت بتعمل ايه

-كنت بحلق دقنى...
*بتحلق دقنك ليه

-عشان هنخرج ان شاء الله

*فين؟
النهاردة...جاتلى دعوتين تبع النقابة ...حفلة معمولة بمناسبة رأس السنة الهجرية ...وعاملين سهرة كده فى فندق سونستا ...فقلت نروح

نظرت له مريم فى كسل وقالت: انا مكسلة اوى يا صاصا .وحاسة انى مش قادرة

قال لها مصطفى معاتبا: مريم بطلى بقى...انتى محسسانى انك اول واحدة تحملى فى مصر كلها...مش فاهم انتى ايه كيفك فى قاعدة البيت

مريم : والله تعبانة النهاردة

مصطفى فى ضيق:على فكرة دى تالت خروجة تبوظيها الاسبوع ده..براحتك يا مريم

مريم:لا لا خلاص ماتزعلش يا صاصا
ثم استطردت فى ضجر مصنطع : هروح خلاص اومرى لله

**************************
*بجد المكان تحفة

- عشان تبقى تسمعى الكلام لما اقولك نروح حتة تروحيها على طول ...كان زمنا دلوقتى قاعدين على الكنبة بنفقر قدام العاشرة مساء

ضحكت مريم ونظرت له وقالت: طبعا يا بنى ...مانا صاحبة الفكرة اصلا

نظر اليها وقال فى مرح : اه مانا أخدت بالى

وبعد عدة وصلات من الانشاد الدينى و عزف الالحان الشرقية

حبيبتى بقولك انا رايح الحمام و جاى
اوك ماتتاخرش
ههههه مش بايدى الوقت فى الحاجات دى

ابتسمت لداعبته...ظلت تتابع العروض امامها بدون اهتمام...واخذت تتلفت وتتأمل من حولها ..و فجأة توقفت عيناها عند مائدة

واخذت تحملق فى الشخص الجالس بصحبة رجلين اخرين...شعرت لثانية او ثانتين ان عقلها توقف عن التفكير ثم تسارعت الافكار امامها
وقالت فى داخلها: ده محمد بتاع الكلية
يخرب بيييته ...ايه اللى جابه ده....مش ممكن ...بقى بعد السنين دى كلها اقابلله صدفة ...ومع جوزى..هو الجدع ده ورايا ورايا

شعرت بان ضربات قلبها تتلاحق و بدات تسترجع شريط الذكريات القديم...ورد فعل خطيبها الاول عندما علم بموضوعه ...لم ينتبه اليها محمد....كان منشغلا بالتحدث مع من بجواره
حاولت ان لا تظهر له ..واشاحت بوجهها فى جهة اخرى.

ولكن دائما تاتى الرياح بما لا تشتهى السفن ...وكأنها باشاحتها هذه نبهته فالتفت حوله بدوره ونظر اليها ثم ادار عينيه فى اتجاه اخر

الحمد لله مافتكرنيش هكذا قالت لنفسها
واخذت تهدا من نفسها وتقول لنفسها يمكن يكون مش هو اصلا..اه ممكن ...ليه لا

و اخذت تقول لنفسها ...لما مصطفى يجى هقوله انا تعبانة عايزة اروح

نظرت الى محمد ثانية لكى تتاكد من انه لم يلحظها...وكانت هذه غلطة عمرها ...فقد تلاقت اعينهما..وهنا انتبه الاخير...وظل محملقا فيها و كأنه يتذكر وجهها...امتقع وجهها و حاولت تحاشى النظر اليه و ...

" انا جيت "

انتفضت مريم ..ونظرت الى مصطفى فى ذعر ..ثم قالت فى ضيق
خضتنى
نظر اليه مصطفى فى حيرة وقال لها :
سورى ماكنتش قاصد.

مصطفى بقولك ...انا حاسة انى تعبانة و عايزة اروح

مالك يا مريم فيكى ايه...ماكنتى كويسة؟؟

مريم فى لامبالاة مصطنعة: يعنى عادى...انا بس حسيت انى زهقت و كمان عايزة افرد ضهرى شوية

طب على الاقل استنى نشرب اى حاجة ...احنا ماكملناش ساعة على بعضها

اطلب انت انا مش عايزة ماليش نفس

نظر اليها فى تحفز ...وبدأ يتاملها وقال لها: مالك يا مريم انتى شكلك مش تعبان... انتى مضايقة

يوه بقى يا مصطفى ...يعنى هيكون مالى فى ايه

كانت تنظر فى عينيه مباشرة ....لاحظت فجاءة انه لا ينظر اليها وانما يركز فى بقعة ما خلفها

مريم هو فى حد هنا ضايقك؟؟

لا لا مفيش ليه بتقول كده

فى واحد قاعد فى الطرابيزة اللى ورانا من ناحية اليمين... عينه مانزتلش من على طرابيزتنا ..انا لاحظته من ساعة ما جيت من الحمام...بس قلت يمكن صدفة

لا لا مفيش اى حاجة...عادى يعنى ...وهى يعنى الناس هنا وراها ايه غير انها تتفرج على بعض

نظر اليها فى شك ...وكأنه يحاول ان يستشف الحقيقة من عينيها...ثم قال:
اوك ...انا رأيى اننا نقوم ....القاعدة دمها تقل

وكأنها تنتظر منه ذلك فهبت واقفة على الفور ....و امسك بيدها و هموا بالمغادرة

" مريم"

تجمدا فى وقفتهما و استدارا فى بطىء
كان هو محمد ....كان مرتبكا قليلا...ثم ابتسم وقال

معلش انا اسف ...انا اصلى كنت بشبه على المدام ...وحسيت انى ضايقتكوا بنظراتى

قال له مصطفى فى تحفز:
مين حضرتك

ارتبك محمد قليلا ثم قال: انا كنت زميل مدام مريم فى الجامعة ...واضح انها مش فكرانى

شعرت مريم بخوف بداخلها ...تمنت وقتها لو لم تولد ابدا.. وقالت فى صوت متحشرج: اه معلش سورى ماكنتش فاكرة اوى....ازيك

مصطفى فى ود مفتعل : مش تعرفينا

ابتلعت مريم ريقها فى صعوبة وقالت : المهندس مصطفى جوزى ....المهندس محمد كان زميلى فى الجامعة

مصطفى فى سخرية مغلفة بمرح: طب كويس انك افتكرتى الاسم كمان اهو

ثم ابتسم فى دبوماسية مصطنعة قائلا: اهلا وسهلا يا بشمهندس...فرصة سعيدة

محمد: انا اسعد يا فندم...كل سنة وانتو طيبين ...بعد اذنكم

ظل مريم و مصطفى واقفين قليلا....استدار مصطفى و وقال وهو يسبق مريم:

يلا يا مدام

**************
ظل الصمت هو سيد الموقف فى السيارة طوال الطريق...لم ينطق مصطفى ببنت شفة...ظلت مريم ترمقه بطرف عينها من حين لاخر...كان محكم قبضته على عجلة القيادة بشدة...وكانت قيادته عصبية وسريعة جدا

* براحة شوية يا مصطفى...دى تانى اشارة تكسرها
- مريم انتى مش عايزة تقوليلى حاجة؟؟
* حاجة زى ايه؟؟
- اى حاجة
*لا

دخل مصطفى شارع جانبى و اوقف السيارة بعنف فاصدرت الاطارات صريرا عاليا ...وقال فى عصبية:

يعنى انتى متاكدة ان مفيش اى حاجة حصلت محتاجة توضيح ؟؟؟؟

ظلت مريم صامتة ...واغرورقت عيناها بالدموع و لم تنبس بننت شفة

اروح الحمام 5دقايق ارجع الاقى وشك اصفر و متنحة و عايزة تمشى مرة واحدة بالرغم من 5 دقائق بس كان المكان عجبك وكنتى مبسوطة ...وبعدين الاقى اخ فى الطرابيزة اللى جانبينا عينه ما نزلتش من علينا...واسالك تقولى ان مفيش حاجة...وبعدين الاقى الكابتن جاى ورانا وبيناديكى باسمك ...وانتى الحمد لله رجعتلك الذاكرة وقتها مرة واحدة وافتكرتيه باسمه كمان.....تفتكرى كل ده مش محتاج اى توضيح

كان زميلى فى الجامعة يا مصطفى مانا قلت كده

طب وطالما هو كان زميلك ممكن اعرف ليه كدبتى وقولتى انك ماتعرفوش

انا ماكدبتش يا مصطفى ...انا بس ماحبتش اضايقك

اه وانتى تفتكرى انى كده ماضيقتش وبعدين انا اصلا مش بالع حكاية زميلى دى....اولا شكله اكبر منك يعنى مش دفعتك ...كمان خوفك و خضتك لما شوفيته فى المكان بتقول غير كده...وتفتكرى انا ايه ممكن يضايقنى انك تشوفى زميل ليكى صدفة...وبعدين نظرته ليكى لما قولتى سورى ماكنتش فاكرة ...كان ليها معانى كتيرة اوى
وعايز تفسير ليها مريم ...عشان انا قربت افقد اعصابى عليكى وماسك نفسى بالعافية

انهارت مريم تماما واخذت تبكى بحرقة واخذت تقول:
والله كان معايا فى الجامعة

بس؟

نظرت اليه للحظة ...ثم استكملت بكاءها وهى تقص عليه كل شىء...حكت له انها كانت مجرد تجربة مراهقة عابرة ندمت عليها بعد ذلك ...وانها لم تتعدى حدود الجامعة....وقصت له عن خطيبها السابق هشام ....وعن رد فعله معها بعدما اخبرته وعن كلام صديقتها داليا ....ظل صامتا و ملامحة صارمة للغاية وهو يتابعها

وبعدما انتهت ...صمت قليلا ثم قال:
يعنى انا دلوقتى الاهبل الطيشة فى الموضوع ده كله ...الكل عارف الا انا

مصطفى صدقنى انا ماكنتش قصدى انا كنت بحافظ عليك

مريم احسبى كده معايا انتى كدبتى عليا كام مرة؟؟

قالت له مريم وهى تمسك بيده وسط دموعها:
مصطفى صدقنى ..حاول تفهمنى

سحب يده من كفيها فى حدة وقال لها: طب يعنى انتى فاكرة انك كده محافظة عليا...يعنى انتى كده خلاص ضمنانى معاكى

انهارت مريم تماما وقالت: مصطفى انا بحبك والله العظيم بحبك و عملت كده عشان كنت عايزة اننا نكون مع بعض...صدقنى انا ضميرى كان بيوجعنى كتيييير اوى...وكتير كان نفسى اقولك...بس كنت بقول ليه اضايقك بموضوع قديم و مابقاش والله يهمنى فى اى حاجة ...مصطفى انا كان وقتها عندى حوالى 19 او 20 سنة ...ماتحاسبنيش على حاجة بقالها 6 سنين
صدقنى يا مصطفى... ماحصلش اى حاجة....الموضوع كان هبل فى هبل ...ارجوك يا مصطفى سامحنى ...سامحنى يا حبيبى...والله انا ماليش غيرك....واديك شايف ان انا وانت من ساعة ما عرفنا بعض وانت مالى عليا حياتى ..ومابقتش شايفة فى الدنيا غيرك...حتى صحابى مابقتش اخرج معاهم...انت حتى بتقولى ان انى بحب قعدة البيت

شعر مصطفى ببركان من الغضب بداخله....واطلق زفيرا حادا محاولا ان يهدأ نفسه ...شعر بمتناقضات بداخله ...نظر اليها وداخله حيرة غريبة بين هذين الشعورين المتناقضين
شعر بغضب لأنها...كان لها تجربة سابقة ... ولأنها كذبت عليه أكثر من مرة...ولكن انتابه شعور بالشفقة تجاهها...خاصة وانه يعلم تماما مدى حبها و اخلاصها له..ولكن سرعان ما قال لنفسه: وانا ايش ضمنى هى كدبت فى ايه تانى و هتكدب عليا بعد كده فى ايه

شعر بحيرة بالغة ..وظل ذلك السؤال يدوى داخله

أسامحها ولا لا؟؟؟؟

تم بحمد الله
1-11-2007
*************************************

وانت بقى لو مكان مصطفى هتعمل ايه ؟؟ او مكان الاولانى خالص هشام؟؟؟

يا ريت يا جماعة كل واحد فى التعليق يقولى رأية ...ولو بنت تقول كانت هتقول عن كل تجربة مرت بيها فى حياتها ولا لا...وكمان تشاركوا فى التصويت اللى معمول على يمينكوا ده...انا عملاه على صراحة البنت مع الولد...لاننا فى مجتعتنا هنا ...الولاد بيتباهوا بتجاربهم الكتيرة...وطبعا العكس مش بيكون كده مع البنت ....

وفى مقولة قبل كده قرتها ودى بصراحة كانت بداية القصة فى دماغى
ان الست يهمها انها تكون اخر واحدة فى حياة الراجل ..مايهمهاش قبلها مين؟؟؟.

لكن الراجل يهمه انه يكون اول واحد...ميهموش بعده مين؟؟

يلا بقى مسيتنة رأيكو فى الكومنتس

وادعووووووووولى عشان عندى امتحانات ميد تيرم ان شاء الله
:(:(:(

سلاااااااااااام

b@d MooD

2007-10-24T05:54:00.000+03:00

ازيكو جميعا عاملين ايه؟؟؟ والله انا مش عارفة اقول ايه ولا اعيد ايه....بس انا دلوقتى فعلا حسيت بشعور اللى بياخدوا قرار انهم يقفلوا مدونتهم و كنت بقعد اقول ايه علاقة ان حد يجيله اكتئاب بانه يتوقف عن التدوين....بس انا بجد انا حسيت اليومين اللى فاتوا دول يعنى حد يحس بالزهق و يفقد الرغبة فى اى حاجة بيحبها....ويكون مكسل ومالوش نفس يعمل اى حاجة ....طبعا الحمد لله على كل حاجة.....انا بس كده من فترة للتانية بلاقى نفسى دخلت فى حالة من انعدام الوزن ..وادخل بقى فى افكار من نوعية

انا مين ...انا ماليش لازمة ...انا فاشلة ...انا ..انا ....حالة من جلد الذات...وطبعا بعتذر بجد لاى حد انا مقصرة معاه فى زيارة مدونته...او اتاخرت فى الرد على تعليقه ...بس بجد غصب عنى....وكمان انشغلت فى بحث كان مطلوب تسليمه بعد العيد...وانا اللى كنت شايلة البحث على دماغى ...وصحابى كانوا ضيوف شرف:ي....شاركوا باساميهم بس على البحث:s:dيلا بقى اعمل الخير الواحد مش بيحب يتكلم عن نفسه :p

حيث بقى ان انا بعيدة عن ملاعب التدوين من 4 اكتوبر.....وفاقدة للياقة التدوينية...فانا قلت كده استعيد لياقة الملاعب ...بتاج ...بجد حمض عندى وبقى عليه تراب و خفافيش و عناكيب و كده

اول تاج

من انتيختى على النت ..وصديقة قريبة اوى منى على الرغم انها من اليكس ...وشفتها مرتين بس على الحقيقة

لكن تقدورا تعتبروا انها من مسلمات النت بالنسبالى :d

يلا بقى كفاية كلام عليها...لحسن تتنطط عليا :pاستلقى وعدى بقى فى الماسنجر

هى my hopes

نبدأ بقى التاج

لو قالولك اختاري عصر من عصور مصرعلشان تعيشي فيه تختار اى عصر و فى عهد اى حاكم .. واشمعنى؟

ههههههههههه فى مثل بيئة قاله نور الشريف فى مسلسل لن اعيش فى جلباب ابى

بيقولك...افتكرك منين يا بصلة وانتى كل اطمة بدمعة

مفيش فى مصر فى وجهة نظرى عصر اقدر اقول ان نفسى اروحله....لان انا ببص للحرية فى المقام الاول و الاخير...ومصر الموكوسة اقصد المحروسة ...ماشمتش ريحة الديموقراطية من ايام الفراعنة ...وحتى على مدار التاريخ...لما كانت المعارضة بتكون شادة حيلها شوية...كانوا بيتسكوا بعدها تمام

فالاحسن اننا نوسع نطاق السؤال ونقول اى مكان و خلاص

فأكيد هقول عصر الرسول صلى الله عليه وسلم ...كنت شفته واتكلمت معاه و خليته يدعيلى دعوة حلوة ويدلنى على الطريق الصحيح بدل التوهان اللى انا فيه ده

على فكرة وانا صغيرة لو كنت اتسألت السؤال ده

كنت هقول نفسى اعيش فى عصر الفساتين المنفوشة و البرانيت و كده :ي ....

كان فيلم ذهب

مع الريح مأثر فيا جامد :ي

كفاية رغى بقى ...ندخل على السؤال التانى

اول اولويه فى حياتك عيلتك ولا شغلك ولا اصحابك؟

اهلى اللى هما بابا وماما و اختى قبل اى حاجة

وبعدين صحابى و بعدين شغلى....بس بردو عشان الواحد مايكنش بيكدب .....ان لما الواحد بيتجوز ...اولوياته بتتغير ...الله اعلم بقى

ايه أكتر حاجة بتحبيها فى رمضان؟

منظر الناس وهى رايحة تصلى فى المسجد...خصوصا صلاة التراويح...لما بلاقى الرجالة و الستات شباب و بنات رايحين كلهم و سايبين كل حاجة ورايحين يصلوا ...ربنا يعمر مساجدنا دايما

اوصفي ليا اجمل فطار ممكن تفطره؟

ماليش طقوس معينة فى الفطار او جو بفضله....بس بالنسبة للاكل نفسه....يا سلام لو كان حمام او رز بالخلطة او شربة سى فود....يبقى حوار كبييييييييير

لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟

ههههههههه يعنى بالذمة ده سؤال

ما اكيد يعنى لو روحنا سألنا قراقوش نفسه قبل مايمسك الحكم ...هتبقى حاكم عادل ولا لا...هيقولك اه طبعا...خلاص انا كمان اه طبعا هى جت عليا يعنى :]

بصوا انا مقتنعة اننا كبشر فينا كل نواقص النفس البشرية...يعنى من الطمع و الغرور و النسيان....وشايفة ان السلطة بتسبب الحاجات دى كلها....وشايفة ان الحكام بعد ما بيسمكوا الحكم بيختلفوا نفسيا عن ما كانوا عليه من قبل ما يمسكوا الحكم....عشان كده لازم يكون فيه ضوابط و معايير موضوعية .عشان نضمن ان الحاكم ده هيكون عادل بيها...مش مجرد طق حنك كده و خلاص

فمثلا لو بقيت انا حاكمة مصر ههحط الضوابط دى:

هعدل النص الدستورى الخاص بفترات رئاسة الجمهورية...وهحددها بمدتين كحد اقصى

هشيل كل النصوص اللى بتقيد حرية الصحافة ...وهلغى اى عقوبة سالبة للحرية فى جرايم النشر..بس فى نفس الوقت هفرض عقوبات مالية كبيرة على اى صحفى ينشر معلومات ملغوطة...هخرب بيته يعنى

هعلى مرتبات القضاة ...عشان احققلهم اكبر قدر من الاستقلالية و اعفيهم من اى ضغط ممكن يوقعوا فيه

هطبق مبدأ من أين لك هذا سواء عليا او على الوزراء ....قبل تولى المنصب او بعد مشيانهم من المنصب

هحدد نظام سياسى معين للدولة

يعنى يا اما نكون دولة برلمانية...ويكون دور رئيس الجمهورية فيها صورى او استشارى ...فى حين رئيس الحكومة اللى هو هيكون انا بيتمتع بكل السلطات ويكون هو المسئول قدام الشعب

ياما نكون نظامنا رئاسى زى النظام الامريكى ...اللى بيكون فيه رئيس الدولة هو المسئول عن كل حاجة...ومايكنش فيه وزراء يكون عندى مجرد مستشارين و مساعدين

ياما اطبق نظام فرنسا المختلط اللى هو بيكون فيه وزراء لكن فى نفس الوقت رئيس الدولة ليه صلاحيات اعلى من رئيس الحكومة ...لكن طبعا مش بالسبهللة اللى عندنا دى....لان احنا عندنا هنا ماشيين فى نظام صلاحيات الرئيس بنظام لا يسئل عما يفعل وهم يسئلون ...استغفر الله العظيم...بس بجد عندنا هنا مفيش حاجة اسمها وزير بيفكر من دماغه كل الاوامر بتجيله من فوق ...بقى مجرد سكرتير...وفى الاخر لما تحصل مصيبة ولا كارثة نلبسها للوزير و نسيب ال.... ولا بلاش

دى المعايير اللى دلوقتى فى دماغى...كمان انا مش عايزة بقى اكمل عشان ماحرقش برنامجى الانتخابى:P

اللى بيبوظ الحكام .. نفسهم؟ ولا الشعب؟ ولا الحاشيه المقربه؟

السؤال ده هيرجعنا للسؤال بتاع البيضة ولا الفرخة

هى سلسلة متواصلة منيلة بستين نيلة ماحدش عارف اولها من اخرها

يعنى لو مثلا قلت سالوا فرعون يا فرعون ايه فرعنك ...قال مالقتش حد يلمنى

بس فى نفس الوقت هو مين ده اللى يقدر يلم الفرعون ....هو الشعوب المقهورة فيها حيل تلم نفسها و تاكل عيش حاف لما هتلم الفرعووووووون...اما بقى بالنسبة للحاشية ...فدول الجماعة الفاسدين الانتهازيين من الشعب اللى بيقولوا مش مشكلة لما الحس جزمة الفرعون واقوله الكلام اللى يريجه و ابسطه ويحسسه ان الشعب بيموت فى دباديب رجليه و صوابعه...وطبعا الفرعون بيعمل عبيط و بيصدق

فبصراحة مش عارفة ...بس اعتقد الحكاااااااااااااام

مين أكتر اعلامي مصري بتحترميه؟

ابراهيم عيسى وششششششششش ربنا يكرمك يا ابو يحيى وماتتسجنش:(

و عمرو اديب و محمود سعد

قريتي ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟؟

لا ماحصلش يا باشا

لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟

انا حاليا مش بشتغل ...بس ان شاء الله من المنتظر انى اشتغل محامية متر يعنى :ح وانا لحد دلوقتى بحس نى ان مش هنفع محامية اوى...وده على فكرة كان جزء من اكتئابى ...انى مش عارفة انا عايزة ايه او ممكن ايه ...وهل الضياع اللى انا فيه ده عشان انا مش عارفة انا ممكن اعمل ايه...ولا انا فعلا فاشلة ومش هنفع فى اى حاجة :( :( غيروا بقى السؤال ده

ايه تانى بلد تتمنى تعيش فيها بعد مصر؟

امريكا او انجلترا او كند...خلى الواحد يعشله يومين بقى بعيدا عن الحر و التلوث والسحابة السودا وبرنامج حالة حوار ومقالات ممتاز القط فى أخبار اليوم:ي

اوصفي ليا ترتيبات اجمل فرح ممكن تحضرية؟

اجمل فرح لما يكون فى اوتيل نضيف اكيد.....اما بقى اجمل فرح نفسى اعمله لنفسى يدينى و يديكوا طولة العمر :ي انى يكون فرح اوبين ...فى مكان كده زى دريم لاند و يكون فيه العاب نارية ..زى اللى بيضربوها ايام الماتشات المهمة :ي ..

بتراعي كلام الناس والقيل والقال؟ لو اه او لو لا قول لى ليه؟

بصوا انا طول الوقت عاملة فيها سبع رجالة...وان مفيش حاجة تهزنى...بس انا من جوايا بتوجع اوى ....والمشكلة ان انا بشيل و بقعد اخزن ...يعنى يمكن كلمة تتقال ومازعلش وقتها...بس بعد كده بلاقى الكلمة جرحانى اوى من غير ما احس

بس مش كتير الكلام ده بيأثر على تصرفاتى

اما بقى بالنسبة لليه...اكيد معرفش طبيعتى كده

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟

يا نهار ازرققققق

انا ممكن يجرالى حاجة...بصراحة ماتفرقش اوى معايا حوار الكاميرا ده...وبالنسبة للموبايل يعنى...اكيد هتأثر شوية

لكن الكمبيوتر

لااااااااااااااا والف لا ....فال الله ولا فالك

انا مدمنة كمبيوتر عارفة انها حاجة مش كويسة وان الكمبيوتر خسرنى كتير من وقتى و علاقانى الاجتماعية ....بس انا مقدرش استغنى عنه ابدا ابدا

السعاده هى؟

صعب انى احدد مفهوم يعنى للسعادة ...لان المشاعر دى حاجة صعب احصرها فى تعريف ضيق معين

فبدون اى فازلكة

السعادة الواحد بيعرفها لما بيلاقى قلته بينط منه و شايف ان الدنيا حلوة اوى ....وحاسس انه نفسه يحضن كل الناس

عندك أمل ؟؟ أسبابك ؟

عندى أمل فى ربنا أكيد...عشان أكيد لا ييأس من روح الله الا القوم الكافرين

بس فى حياتى انا

مش عارفة

لما تحب تهرب من كل شئ بتروح فين؟

ياما بنام ...ياما بقعد الكمبيوتر...مش بقولكوا مدمنة كمبيوتر:ي

امتى أول مره خدتي فيها نفس طويل كده وقلت بينك وبين نفسك يااااه الظاهر انا فعلا كبرت؟

هو انا بقول كده لنفسى كتير ...بس من غير ما اخد نفس بصراحة :P

اقولكوا على حاجة....انا من ساعة العيد الميلاد اللى تميت فيه 9 سنين و انا نفسى انى ماكبرش وافضل صغيرة وكل لما الرقن بيعلى ...اقول لالا مانا بردة كده اعتبر صغيرة ....شوفوا بقى شعورى وانا عارفة انى بعد شهرين ان شاء الله هتم 21 سنة :sوبعدين انا بحس ان الكبر مش بيتحسب بعدد السنين ...يعنى لو حد عاش حياته و قضى اوقات لذيذة حلوة ...هيحس بطعم السنين و هيكون مستمتع بكل سن

انما انا اللى وجعنى

انى حاسة انى ضيعت كتير من حياتى ...وان فى حاجات كتير ماعشتهاش...وانا فى السبب فده على فكرة

يلا بقى

الحمد لله

ماتقلبوش عليا البطاطس :d

لما بتعمل عمل خيرى بيكون ايه هو دافعك الاول؟

اكيد الواحد بيكون هدفه الاول و الاخير ربنا سبحانه وتعالى ...ولما الشيطان بيقولى على فكرة انتى بتعملى كده عشان الرياء....بروح قايلاله لا معلش بقى انا بعمل كده لوجه الله ....وحتى لو رياء ...ربنا هيقبل ان شاء الله

شوفتونى وانا ناصحة :ي

بتشربي سجاير؟ لو الاجابه اه ايه شعورك لو شفتي ست بتشرب سجاير؟ وليه ؟

ههههههههه مش عارفة ليه افتكرت محمد هنيدى فى فيلم جاءنا البيان التالى وهو بيقول انا بطلت مخدرات باعجوبة:ي

سجاير ايه بس يا عم الحاج ...انا اخرى اكل لبان و اشرب ميكس شوكولاته

انا بقى بالنسبة لتدخين الست

هقولكوا بصراحة انا عقلى مقتنع ان السجاير دى حاجة مضرة بالصحة و خلاص يعنى ست راجل قرد ماتفرقش....لكن طبعا بما انى عايشة فى مجتمع بيحتقر الست اللى بتشرب سجاير او بيبصلها بصة مش تمام ...فمع الاسف وبقولها مع كل اسف ...انى المجتمع ده ثقافته باهتة عليا :s

بتعرف ايدك اليمين من الشمال ازاي؟
يا سلام على الاسئلة الوجودية دى

ايدى اليمين اللى بلطش بيها اى حد بيضايقنى :p

ايه اكتر اله موسيقيه بتحبها ؟

الجيتار طبعا

فى رأيك ليه الذوق والنخوه اتعدموا؟
مفيش حاجة اسمها اتعدموا...هما موجودين بس قليلين ...اما بقى بالنسبة لموضوع ليه ده مش عارفة بصراحة

ايه الحاجه اللى لو حصلتلك تبقى سعيدة قوى؟؟؟
اقابل الشخص اللى يخلينى اثق فى الحب

تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟
بصوا انا ماليش فى حوار الارضى ده و كده

فاختار فلوس فى البنك او كام عمارة ....اشترى بقى عمارات وابعها

واكون مستغلة و جشعة هع هع هع ضحكة شريرة

البحر و لا النيل؟؟؟
مش عارفة .....الاتنين كويسين ...بس ممكن النيل ...لانه اكتر رومانسية وهدوء زى ما بتسيبه بتلاقيه مخلص يعنى

مركب و لا طياره؟؟
والله انا كنت بحب الطيرات اوى وانا صغيرة ...سواء ركوب او انى اشوفها...ههههههه كان عندنا واحدة صحبة العيلة بتجلنا من السعودية كل سنة كان اسمها طنط عفاف....كنت كل ما اشوف طيارة اقف فى الشباك واقعد اقول

طنط عفااااااااااااف طنط عفاااااااااااف

هابلة اوى انا

بس من وانا عندى 11 سنة لحد دلوقتى ....بيجيلى على فترات متابعدة حلم ...ان واقفة وبشوف طيارة بتقع و وبشوف النار طالع و كده بقوم من الحلم مرعوبة ....فده اللى خلانى بقتيت جبانة اوى من الطيارات.....ولما بسمع طيارة معدية وتكون صوت محركاتها عالى شوية ...عشان بتكون مثلا قربت تنزل المطار...بيكون قلبى فى رجلى

مجنون و لا عاقل؟؟

هههههههههههههههه لسه النهاردة اختى قايلالى و بتقولى بجد مش بهزار

انى محتاجة عكاشة عشان يعالجنى

تقرأ كتاب و لا تتفرج عليه فيلم؟

على حسب ....انا بحب الاتنين اوى ...خصوصا لو كان الكتاب رواية جامدة ...اما لو كان كتاب عادى يبقى اكيد فيلم

!!! ازاى النبى صلى الله عليه وسلم يتجوز بنت عندها 9 سنين

2007-10-04T10:48:00.000+03:00

سؤال صريح وعايزة اجابة صريحة

بتتكسف لما حد يقولك ازاى نبيك اتجوز طفلة عندها 9سنين؟؟

ماتردش دلوقتى

من مدة كده كنت كالعادة بهيم على وجهى فى المدونات ...مدونات تشلنى ومدونات تحطنى لحد ما وقعت فى مدونة واحد اسمه صلعم....أعتقد ان اسم صلعم ده جاى من الاختصار بتاع صلى الله عليه وسلم...مش عارفة يمكن اكون غلطانة...المهم انا لولا انى مش عايزة انشر مدونة حقيرة زى دى انا كنت حطيت اللينك بتاعها...لكن انا هكتفى بس انى اقول اسمه...المهم دخلت المدونة دى ...لاقيت بوست منشور باسم

كانت اجسامهم كبيرة

.....وبيناقش فيها او بمعنى أدق بيتريق على أن الرسول عليه افضل الصلاة و السلام اتجوز السيدة عائشة رضى الله عنها وهى عندها 9 سنين بس...وطبعا كان اسلوبه فج جداااا ولدرجة انى ماقدرتش اقرا الكلام كله كنت بلقط سطور كده ...غير الصور الى كان حاطتها....كان بجد حاجة تحرق الدم....المهم انا بصراحة ماكنش ينفع امشى كده من غير ما اعمل حاجة.....طالما انا عندى ردود و حجج...وطبعا انا مش هدخل اشتم فيه زى ما كتير بيعلموا فى المواقف دى....قبل ما اقول الكلام اللى انا قولتهولوا ....جاوب على السؤال اللى فوق...

.بتتكسف لما حد يقولك كده عن نبيك ؟؟؟؟

مع الاسف كتير مننا...لما بتيجى السيرة دى بيتكسف كده وودانه تحمر و يغير الموضوع....من غير ما حتى يكلف نفسه انهيقرا او يعرف الموضوع بالظبط....

المهم انا قبل كده كنت سمعت درس فى الموضوع ده و احب اقولكوا اللى انا سمعته

مبدأيا كده

احب نسال نفسنا سؤال

هى الشبهة بتاعة ان النبى عليه الصلاة و السلام تزوج السيدة عائشة وهى9 سنين ابتدت تظهر من امتى؟؟؟؟

يعنى فى ايام الرسول صلى الله عليه و سلم ...الكفار اتهموه بابشع الحاجات

قاله عليه مجنون و قاله عليه ساحر و ...و ....

لكن حد سمع ان فى حد قبل كده من الكفار قاله ياللى اتجوزت كتير او يا اللى اتجوزت بنت صغيرة؟؟؟؟

الاجابة هى لا

طب نسال نفسنا ليه ماحدش قاله كده

الاجابة بكل وضوح

ان البيئة و العرف وقتها ...كان بيخلى مسألة جواز البنات الصغيرة عادى جدا و شىء مقبول جدا جدا

وهدلل على كلامى ب4 نقاط

ان السيدة خولة بنت حكيم اللى هى عرضت على النبى صلى الله عليه وسلم انه يتزوج بعد السيدة خديجة

وقالت له

الا تتزوج يا رسول الله ؟؟

فبكى النبى صلى الله عليه وسلم وقال لها

؟؟وهل بعض خديجة من احد

؟؟فقالت نعم يا رسول الله ومن للبيت و العيال

قال فمن

قالت ان شئت بكرا و ان شئت ثيبا

فقال لها فمن الثيب

قالت سودة بنت زمعة

ومن البكر

قالت بنت احب الناس اليك بنت ابا بكر

اظن كلام الست يوضح ان الموضوع عادى جدا ...وانها بتعرض الموضوع و بتخيره عادى جدا وكان معيار المفاضلة ما بينهم ثيب ولا بكر

مفيش سيرة عن السن ...ما قالتلوش مثلا عايز واحدة صغيرة ولا كبيرة

علما بان السيدة سودة كان سنها كبير جدا

لما النبى عليه الصلاة و السلام قالها روحى و قوللهم فراحت السيدة خوله لام السيدة عائشة وقالتها

ابشرى بخير يوم طلع عليكى منذ ولدتك امك

قالت لها

وما ذاك

قالت لها

رسول الله ارسنلى اخطب له عائشة

فكان رد ام السيدة عائشة ايه بقى انتظرى حتى نعلن ابا بكر...فجه سيدنا ابو بكر فقالت له على الموضوع فقالها

انظرينى لا استطيع ان ارد عليكى الان ...

تفتكروا ليه قالها مش هقدر ارد عليكى دلوقتى ....وكلنا عارفين ايه شعور و محبة سيدنا أبو بكر للرسول صلى الله عليه وسلم قالهم فيما معناه

ان فى واحد متكلم عليها اسمه مصعب بن عدى لابنه

وجبير ده كان كافر على فكرة عشان وقتها ماكنش لسه اتحرم زواج المسلمة من غير المسلم

يبقى اظن الموضوع مفيهوش شىء خارق للعادة ...لأنها كان فى واحد اصلا متكلم عليها..

كلنا عارفين ان السيدة حفصة بنت سيدة عمر الخطاب كانت من زوجات الرسول عليه الصلاة و السلام...عارفين اول جوازة ليها قبل ما تتجوز الرسول صلى الله عليه وسلم كانت وهى عندها كام سنة؟؟؟ كانت اول جوازة ليها وهى عندها12 سنة

طب ممكن حد يقول ان الموضوع ده المسلمين بس هما اللى بدعوه وان الكلام ده مش موجود عند

غيرهم

لا معلش مش المسلمين بس اللى عندهم الكلام ده.... ده عند اليهود كمان و الدليل على كده

ان حيى بن اخطب اللى هو كان واحد من كبار اليهود بنته السيدة صفية رضى الله عنها كان اول جوازة ليها وهى عندها 11 سنة لواحد من اليهود قبل ما تسلم

*********

اظن بعد كل الادلة دى مفيش حد يقدر يقول ان زواج النبى صلى الله عليه وسلم كان شىء غريب و غير معترف بيه فى الوقت و البيئة اللى كان عايش فيها صلى الله عليه وسلم

طب ننتقل للنقطة التانية

ممكن حد يقول طب ماشى معاكى يا ستى انى دى كانت عادة عربية و كده....بس ده ما يمعنش انه فى الاول و الاخر انه اتجوز طفلة

نسال سؤال هو ايه المعيار اللى نقدر نقول بيه على حد هو طفل ولا مش طفل

اكيد اكيد المعيار هو البلوغ

خلونا نتفق ان البيئة و المكان و حرارة المناخ بتحدد عمر البلوغ

؟؟يعنى هل مثلا البنت فى سيبريا و المناطق التلج دى بتبلغ فى نفس العمر اللى بتبلغ فيه مناطق البلاد الحارة زى الخليج مثلا

اظن دى حاجة متعارف عليها جدا...أن البنت فى المناطق الحر بتبلغ اسرع و بتكبر اسرع و بيظهر عليها العجز بدرى والله فى بنات مش فى الخليج اللى هو حر اوى.... ده فى مصر كمان بيبلغوا فى سن ال9 و ال10

اما بنات المناطق الباردة ممكن يوصل بهم سن البلوغ ل 18 سنة وعشان كده مش بيعجزوا بدرى

والكلام ده مش من تأليفى اكيد ...عشان انا قلت الكلام ده لصلعم ده ..رد عليا وقال ان الكلام ده غلط ومفيش حاجة اسمها كده

انا بقى هرد على التكذيب ده مش بكلامى ...لأ بكلام واحد مستشرق ...اللى قال وكلامه على فكرة موجود فى كتاب لبنت الشاطىء:

وكانت عائشة على صغر سنها نامية ذلك النمو السريع الذى تنمو به نساء العرب الذى يسبب لهم الهرم فى الاواخر السنين التى تعقب العشرين
ولكن هذا الزواج شغل بعض المؤرخين لمحمد نظروا له من وجهة نظر المجتمع العصرى الذى يعيشون فيه
ولم يفكروا ان هذا الزواج كان ومازال عادة اسيوية

ولما يفكروا فى ان هذا العادة ما زالت قائمة فى شرق أوربا الى الان وكانت طبيعية جدا
فى اسبانيا و البرتغال الى سنين قريبة ..و انها ليست غير عادية اليوم ، ففى بعض المناطق الجبلية البعيدة بالولايات المتحدة يوجد مثل ذلك

يعنى يا جماعة مستشرق ومالوش اى مصلحة انه يدافع عن الرسول صلى الله عليه وسلم وماتكسفش يقول الكلام ده بحيادية نيجى احنا بقى نتكسف!!

السيدة عائشة لما اتجوزت النبى صلى الله عليه وسلم كانت ناضجة و بتحس بكل الاحاسيس اللى بتحس بها المراة...

وبعدين ماحدش يقدر يقول ان موضوع النضوج ده بيكون مرتبط بسن معين يعنى مثلا فى فلسطين بنلاقى اطفال واقفين قدام الدبابات الاسرائلية وجها لوجه و يحدفوها بالطوب...هل احنا اطفالنا اللى فى نفس السن اللى مصر يقدروا يعملوا كده؟؟؟بلاش اطفالنا احنا كشباب

انا مثلا اهو شاحطة كبيرة ولو شفت فار ولا صرصار بيطير ممكن اروح فيها من الخوف هههه

و واقع الشاب فى فلسطين اللى رايح ياخد تار عمه اللى اتقتل مثلا ورايح يعمل عملية استشهادية ...غير واقع الشاب اللى سهران على النت بيشايت بيعمل شات يعنى وبينزل اغانى

المقصود يعنى ان موضوع النضوج ده مرتبط بالبيئة المحيطة

وبعدين لو مثلا رجعنا لورا 30 سنة

كان معدل جواز البنت من 18 ل 20سنة

واللى تعدى ال20 دى من غير جواز كانت تبقى مشكلة ويقولوا هى اتاخرت كده ليه

كان هيبقى موقفى وحش اوى لو كان الموضوع ده لسه موجود ههه

لكن لو فى بنت دلوقتى فى 2007 اتجوزت وهى 18 سنة...اكيد بنستغرب ونقول ليه اتجوزت بدرى كده

ودلوقتى بقى معدل الجواز من 25 ل 30

نيجى بقى نقارن الفرق اللى حصل بين 2007و السبيعنات

وبين ال2007 ومن 1400 سنة

اكيد المفاهيم و التقاليد بتغير

خلاصة الكلام

..لو حد بعد كده قالك ازاى النبى بتاعك يتجوز بنت عندها 9 سنين ؟؟؟ امانة عليك يا شيخ انك ماتسكتش و ادهوملوا تمام بالحجج و الاسانيد

المهم انى بعد المجادلة دى كلها مع المدعو صلعم ...فى الاخر قالى : ايوه انا بقى قفشت على نقطة ومصر على رايى ولو واحد كبير اتجوز بنتى وهى طفلة كده هقتله

انا بقى امتنعت عن التعليق تانى ....لانى كده خلاص جبت اللى عندى...وهو اللى معرفش يرد عليا

كل سنة وانتو طيبين جميعاااااااااا

!!!أخى العزيز ...كم أحتاج اليــك

2007-09-27T04:04:00.000+03:00

بالرغم انى مش بحب اكتب بوستات عن نفسى كتير و بحس ان حياتى الشخصية مش هتكون مهمة ان حد يعرفها او فيها مايستحق النشر....لكن ساعات الواحد بيتخنق وفعلا بيكون عايز حد يسمعه...مش مهم حد يعلق عندى ولا حد يقول حاجة على كلامى ....لكن كفاية ان الواحد طلع الكلام اللى فى نفسه...

طبعا من العنوان واضح انى بتكلم على اخويا

.مع الاسف اخويا ده مش موجود

لالالالا

ماتفتكروش انه حصله حاجة...هو اصلا ماتوجدش لانى ماعنديش اخوات ولاد من الاصل
دايما من وانا صغيرة كنت بسمع صحابى البنات بيشتكوا من اخواتهم الولاد وكل واحدة تقعد تقول

ده احمد اخويا ده رخم اوى

والتانية تقول

ده عايز يعمل عليا راجل

وانا اقعد كده اقول لنفسى فعلا اللى فى ايده نعمة مش بيقدرها...وساعات كنت بحس بغيرة ...لما مثلا نكون متجمعين فى بيت واحدة مننا وواحدة مثلا تتاخر براحتها عادى وتقول اصل اخويا هيجى ياخدنى ...وانا اكون مضطرة انى اروح بدرى عشان ياما هروح لوحدى او بابا هيجى ياخدنى وهو بينام بدرى وماينفعش ينزلى مخصوص متاخر ...او مثلا الاقيها عاملة حساب لاخوها ...ونظام اصل اخويا زعقلى وقفش عليا

مع الاسف انا من زمااااااان وانا بحس باحتياج فظظظيع لحكاية الاخ دى ....

واللى زود الموضوع اكتر انى عمرى ماكان ليا زمايل ولاد فى المدرسة ...وفى الكلية بتبقى ظاهرة كونية تستحق الملاحظة لو حصل ويوم اتكلمت مع ولد فى دفعتى صدفة ....وكمان احنا مش قريبين من قرايبنا اوى و بنشوفهم فى الاعياد و المناسبات بس تقريبا عيلة رايحة النار فموضوع الاخوة ( اخوة ولد يعنى) و الحاجات دى معدوم عندى...اكتر وقت بقى حسيت انى فعلا فى امس الحاجة لاخ ولد يقولى اعمل ايه ...كانت فى مشكلة حصلالى من سنتين كده ...وكنت وقتها بجد ربنا عالم بيا و كنت حاسة انى لوحدى فى الدنيا دى ....وحسيت انى ماليش الا ربنا فعلا ...والحمد لله ربنا كريم و خلى الازمة دى تعدى ....بس انا وقتها فعلا حسيت يعنى ايه كلمة اخ يكون مسئول عن اخته ويساعدها فى مشاكلها..ممكن حد يقولى طب ماكنتى تروحى لباباكى تحكيله...هقولكوا ان انا و بابا علاقتنا مع بعض زى علاقة مئات الابهات المصريين مع عيالهم...مايعرفش حاجة عن مشاكلى او الحاجات اللى بتضايقنى ...بالرغم من انا وهو نبان صحاب و كده و ميولنا واحدة لكن ماتعودتش اروح احكيله عن حاجة مضيقانى او عن مشكلة عندى ...ويمكن ده كان سبب فى لجوئى للشات..وكنت بتكلم مع كل الناس ولاد و بنات...وكل واحد يقولى انتى زى اختى بالظبط...وفى الآخر طلعت بنتيجة مهمة ....ان مفيش حد كلمنى فى الشات اعتبرنى اخته وبيكلمنى لوجه الله وعرفت ان خلاص مستحيل يكون ليا اخ وقفلت مرحلة الشات دى نهائيا من حياتى

المهم هتقولولى وانتى جاية بعد 20 سنة تنوحى وتقولى انك عايزة اخ ولد اكبر منك ...هقولكوا ان انا كنت خلاص بتناسى الموضوع وبقول خلاص ده نصيبى بقى ...جت حصلت حاجة ..ماحدش يتصور جرحتنى اد ايه ...وحصلت من خلال المدونة دى ....كنت كتبت كلمة هنا وانا معرفش انها عيب كنت فكراها كلمة عادية وكنت كاتباها على سبيل التهريج وكنت بسمع كتير بيقولوها سواء ولاد او بنات وبقراها فى الجرايد ولولا انى عرفت انها عيب انا كنت كتبتها دلوقتى لانى كنت فكراها كلمة عادية...دخل هنا واحد مدون من طرف واحدة صحبتى وهى مدونة هى كمان ....المهم الولد ده جه علق عندى وقالى

ايه الكلمة دى !! انتى شكلك بتقعدى على قهاوى كتير ...

انا قلت هى الكلمة مالها ؟؟؟

جت صحبتى دى وقالتلى انه علق معاها على الكلمة وقالها

...انو مستنكر جدا ان الكلمة دى تطلع من بنت!! وانه مايرضاش لاخته او قريبته انها تقول او تقرا الكلام ده!!انا بالكلام ده حسيت ان حد جاب سكينة و جاب كرامتى نصين ....حسيت انى بجد وحيدة اوى ...وحسيت انى اتكسفت اوى وووشى ولع نار من الكسوف واللى هو يا ارض انشقى و ابلعينى
ومع وجع الكرامة بقى ..فكرة احتياجى لاخ ولد اكبر منى صحيت تانى ...وبجد بدأت احس انى وحيدة اوىىىى ومفيش حد ممكن يوجهنى ويقف معايا فى الدنيا دى...وكنت خلاص قربت اعيط ...فجيت كتبت البوست ده:(

اقولكوا على حاجة :ي

من كام سنة كده كنت بقعد اسرح مع نفسى و اتخيل زى ما بيحصل فى الافلام....ان الواحد على كبر كده يكتشف ان ليه اخ ولد من ام تانية ...نظام بقى بابا اتجوز على ماما زمان والاقى عندى مرة واحدة اخ كبير عنده بتاع 25 سنة مثلا ونبقى صحاب انا وهو واحكيله على كل حاجة مضيقانى واخد رايه فى كل حاجة

ههههههههه اوعوا حد يروح يقول لماما
يلا بقى معلش قلبتها غم انا المرادى ...بس اهو الواحد طلع الكلمتين اللى فى نفسه

ملحوظة
بليز مش عايزة فى الكومنتس نظام بقى اعتبرينى اخوكى و كده (طبعا كلنا اخوة فى الله ) واى حاجة عايزاها انا موجود وفى الخدمة ....بلاش تحسسونى انى صعبت عليكو و انكو هتلمولى عشان اعمل العملية:ي...

دى مجرد فضفضة مش اكتر

تحياتى ليكو كلكو

H@pPy R@m@d@n FoR @LL

2007-09-16T17:54:00.000+03:00

كل سنة وكل البلوجرية طيبين

رمضان اهو جه يا ولاد ...حاسة انه جه بسرعة و فجأة

او يمكن انا مستغرباه عشان جه فى الصيف

بس بضايق لما ناس كتير تقعد تقول ان رمضان مابقاش زى زمان ..يا جماعة رمضان هو رمضان بكل خيره و بركته

سمعت رأى لعمر طاهر عجبنى اوى فى رمضان

كان بيعلق بردو على نفس المقولة اللى بتقعد تقول رمضان مش زى زمان

قال

كل رمضان ليه طعم وليه شكل ..مش ممكن هيكون فى رمضان زى رمضان

وشبه رمضان

( مع انى مابلعتش التشبيه اوى ) انه عامل زى قصص الحب

مفيش قصة زى التانية

يعنى رمضان بتاع المذاكرة و الامتحانات غير رمضان بتاع الاجازة

ورمضان بتاع البرد و التكتكة تحت البطانية قبل الفطار بربع ساعة غير رمضان اللى بنكون حرانين فيه وبنحلى بايس كريم بعد الفطار

رمضان بتاع فوازير نيلى وشريهان غير رمضان بتاع تامر وشوقية

فعلا كل رمضان وليه الجو بتاعه و الريحة بتاعة الشهر البركة اللى بتخليك ماشى حاسس انك مطمن و هادى

بصراحة انا كنت ناوية انى اكتب بوست ازاى نستعد لرمضان و كده

والعبادات اللى المفروض نعملها

بس فى ناس كتيرة اتكلمت فى النقطة دى احسن منى

ومش عايزة اقعد اعيد وازيد فى الكلام

لكن انا عايزة كل واحد يخش الشهر ده تحدى مع نفسه فى حاجة معينة

يعنى زى ما الكل عارف ان الشهر ده بيعلمك تمسك نفسك و تمنعها من حاجات حلال زى الاكل و الشرب

فمن باب اولى انك تمسك نفسك عن الحرام

طبعا انا كلى ذنوب مش جاية اعمل فيها الشيخ بلحة واقعد اقول ده حرام وده حلال

كل واحد عارف هو مهبب ايه فى عيشته :ي

عشان كده كل واحد لازم يركز كده مع نفسه

وياخد عهد مع نفسه انه هيبطل حاجة معينة و يكافح معاها طول الشهر وان شاء الله يلاقى نفسه ربنا تاب عنه بعد الشهر و يتخلص من الذنب ده

يعنى مثلا اللى مش بيصلى بانتظام ليه مايخدش الشهر ده تحدى مع نفسه؟

واهو الشيطان حاله واقف اليومين دول ومالوش كلام عليك :ي و سهل انك تتحكم فى نفسك

وتقوم نفسك للصلاة اول ما الاذان يأذن على طول

على فكرة انا بداية انتظامى مع الصلاة كانت مع رمضان

كنت وقتها فى خمسة ابتدائى وميس فاطمة بتاعة العربى ربنا يكرمها

قعدت تقولنا اللى مش بيصلى مالوش صيام

انا بقى صعب عليا صيامى اوى وقلت لازم بقى انتظم ومن ساعتها وانا الحمد لله بصلى

صدقنى هما اسبوعين تلاتة و هتلاقى الموضوع اتوماتيك كده اتبرمجت خلاص على الصلاة

ومثلا

اللى متعود يشوف حاجات مش تمام ....ليه مايخدش الشهر ده تدريب لعينه انها ماتشوفش الحرام

يعنى اكيد انت يا اللى بتشوف الحاجات دى مش وحش لدرجة انك بتشوفها وانت صايم

ليه بقى ماتخدش الموضوع تدريب ليك انك تمسك نفسك عن الحاجات دى

وتفتكر الحديث بتاع الرسول عليه افضل الصلاة والسلام

العين تزنى و زناها النظر

ومثلا

موضوع الاغانى

وفى الموضوع ده انا بخاطب نفسى اول واحدة

ليه ماندربش نفسنا اننا مانسمعش اغانى خالص فى رمضان

بصرف النظر عن الجدل حوالين حرمتها او حلالها

اكيد ماحدش ينكر ان الاغانى بتلهى شوية وبتخلى القلب غافل ومش حاسس بالقرآن

طبعا مش بتكلم عن الاغانى الدينية او اللى بتتكلم فى مواضيع عامة

انا بتكلم عن الرومانسية

ليه مانخدش الشهر ده تدريب على اننا نسمك شوية نفسنا قدام الاغانى ومش اى شريط جديد ينزل نريل عليه

اخر حاجة بقى و همشى على طول

القرآن يا جماعة

الكتاب اللى بيقعد عند كتير منا عليه تراب من رمضان لرمضان

مش المفروض بقى ده الموسم

ناوى تجيب كام خاتمة السنادى؟؟؟

بلاش يعدى عليك رمضان وانت ماجبتش خاتمة على الاقل

ده السيرزون يا اخى

ولو مش بتقدر تقعد تخلص جزء كده فى قاعدة واحدة فى اليوم

قسم الجزء

يعنى مثلا اقرالك 4 او 5 صفحات بعد كل صلاة او قبلها هتلاقى الجزء خلص معاك من غير ما تحس

و خد نية ان انت بتعود نفسك على قراية القران بعد رمضان ولو حتى بصفحة واحدة فى اليوم

بس اوعى تكون هاجر لكتاب ربنا ومش بتبص فيه غير من السنة للسنة

يلا يا جماعة

كل سنة وانتو طيبين

ورمــضــــــــ كريم ــــــــــــــــــــان

اسيبكو بقى مع شوية صور ....عشان تشوفوا شوشو بيعمل فينا ايه وبيضحك علينا ازاى ابن ال.... :ي

رايحة اذاكر مع صاحبى

2007-09-05T04:03:00.000+03:00

الصــــــــــداقة

فى رأيى ان اول انطباع بيجى لكلمة صداقة فى ذهن الواحد اول ما بيسمع الكلمة دى

هو الصحبيه بين البنت للبنت والولد للولد.....لكن هل بقى بيجى فى ذهنك للوهلة الاول لكلمة صداقة

انها ما بين بنت و ولد؟؟؟؟؟

دى بقى نوعية الصداقة اللى انا جاية ارغى فيها النهاردة

بعيدا عن اى افكار او انتماءات او اى حاجة

نحلل كده الموضوع مع بعضنا واحدة واحدة

وهبدأ بسؤال ...ويمكن انا عملاه استفتاء على ايدك اليمين كده وانت قاعد ...

هو فعلا فى حاجة اسمها صداقة بين الولد و البنت

؟؟؟

طب هى الصداقة يعنى ايه

مش هقعد بقى اقول مصطلحات كبيرة و اسمع الكلمتين اللى اخدتهم فى الثانوية العامة فى النص بتاع جفاء الصديق بتاع بن المقفع والحورات دى

لا بالبلدى كده

يعنى ايه صديق بجد

؟؟؟

صديق

يعنىمعاه كل اسرارك

عمرك ما تتكسف منه

تحس ان انتو الاتنين نفس التفكير و الطباع

وقت ما تكون محتاجه تلاقيه

بتعرفه لوجه الله تعالى

مش عايز منه مصلحة ولا بتاع

صديق يعنى وقت لما تعوزه تلاقيه ....فى اى وقت وفى اى مكان

يعنى ممكن تهزر معاه هزار اوفر وواثق انه مستحيل هيزعل منك

حط كل شروط الصداقة دى بقى

وحاول تطبقها بين الولد والبنت

فى مجتمعتنا الشرقية اللى احنا عايشين فيها

ينفع اتنين يكونوا مطبيقين الشروط دى مع بعض 100%ولا لا

؟؟؟

مش هتكلم من الناحية الدينية دلوقتى

لان اصلا انا مش مؤهلة انى اتكلم فيها

لكن نتكلم الاول فى الناحية الاجتماعية

انت ايه رايك فى الصداقة بين الولد والبنت

يعنى لو كنت فى الكلية مثلا

ولاقيت بنت وولد قاعدين مع بعض لوحدهم ومندمجين مع بعض اوى فى الكلام

هيجى فى بالك ايه اول ماتشوفهم

انهم قاعدين بيفضفضوا لبعض عادى كاخوات وصحاب

ولا

عشان حاجات تانية

انا شخصيا اول انطباع بيكون بالنسبالى انهم اتنين مرطبتين

مش عارفة بقى دى نظرة محدودة ولا ايه

بس ده الانطباع اللى بيجيلى

طب مثلا

لو انت واقف كده ولاقيت واحد بيتكلم على ان راح المكان الفلانى مع زميلته يتفسحوا

اصدقاء بقى

انت بيكون ايه موقفك

؟؟؟

انا بحس ان ده غلط ....مش عارفة بقى انا بقى اللى دماغى متربسة و جاية من حلايب وشلاتين ولا الموضوع ده فعلا غلط؟؟؟

طب بلاش كل ده لو مثلا فى شغلك لاقيت موظف و موظفة قاعدين ماسكين ودن بعض ودودة وماحدش عارف هما بيقولوا ايه ...وعلى الحال ده على طول...

ايه اللى بيجى فى نفوخ حضرتك

بتتبسط وتمصص شفايفك وتقول يا سلام

ونعم الصداقة

ولا

بتقول مالهم دول

؟؟؟

انا شايفة ان صعب فى مجتمعنا ان الصداقة بين الولد والبنت تكون مقبولة

يعنى لو حضرتك من انصار الراى اللى بيقول

ان في حاجة اسمها صداقة بين الولد والبنت

بذمتك كده

هتكون موافق ان اختك او بنتك يكون ليها صديق

وانا بقول صديق مش زميل

فيه فرق كبير بين الكلمتين

يعنى تكون قاعد

تلاقى بنتك جاية تقولك

بابا انا رايحة اذاكر مع تامر صحبى

وقتها هتقولها ماشى يا حبيبتى بس ماتتأخريش

ولا

هتقوم تجبها من شعرها وتطلع المقرر على جتتها صفحة صفحة؟؟؟

او مثلا تتدخل على اختك الاوضة تلاقيها ماسكة التليفون ونازلة رغى

بتكملى مين

ده مصطفى صاحبى

هتقولها سلميلى عليه وتاخد الباب فى ايدك وانت ماشى

ولا هتكسر التليفون على دماغها ودماغ مصطفى

يا ريت نكون صرحة مع بعض

يعنى مايجيش واحد يقولى

لا طبعا فى حاجة اسمها صداقة بين الولد والبنت

ولو سالته ترضى كده لاختك

يتحمق اوى ويقولك

لا طبعا بس

انا ضامن نفسى وعارف انى بتقى الله فى بنات الناس لكن مش ضامن غيرى

يا ريت بلاش المعايير المزدوجة دى

طب بلاش كل ده نفترض ان الموضوع مش هيكون اعتراض من الاب او الاخ و كده

احنا يا بنات من نفسويتنا كده:ي

تقدرى تحكى كلللللللللل حاجة فى حياتك و يومك العادى لولد انتى معتبراه صديقك زى ما بتحكى كل حاجة لصحبتك؟؟؟؟؟

اكيد مستحيل لو حلفتيلى على المية تجمد

والا تكونى واحدة معندهاش ريحة الحياء

طب نيجى بقى للناحية الدينية

زى مانا قلت انا مش عايزة افتى من عندى واقعد اتكلم فى الدين وانا مش متخصصة فيه

لكن انا هتكلم بالسينس كده و الفطرة

يعنى ربنا بيأمرنا بغض البصر ..هل ده ينفع يطبق على الصديق؟؟...يعنى اكون بكلمه وانا مودية وشى الناحية التانية...طب ده انتى حتى ماينفعش تصلى قدامه!!! وده ايه صديقققق

يعنى المفروض بتقضى معاه معظم الاوقات

والله يا جماعة انا مش معقدة ...بس انا من اللى بشوفه فى الكلية

بحس ان فى هبل مرشوش فى الجو

البنت تهزر مع الولد بالايد عادى جدا

والولد يشدها من ايدها و الطرحة

يقعدوا لازقين فى بعض ...مش بيكون فيه 2ملليميتر هوا

بجد حاجات عجيبة

بكون ماشية اقول

اكيد بقى انا اللى غلط

والمصيبة ان لو جيت كلمت واحد فيهم كده

يتحمق اوى و يقولك

احنا زمايل

يا نهار ازرق

زمايل اومال لو اصدقاء هتعملوا ايه

؟؟؟

وبعدين فى جملة شائعة اوى تقولك ..احنا اصدقاء بس بنتعامل بحدود

طب ماشى هفترض ان فيها حاجة اسمها صداقة بحدود

مين بقى اللى بيحدد الحدود دى؟؟ ...والحدود دى شىء نسبى ولا مطلق؟؟؟

يعنى مثلا فى ناس شايفين ان حدود الصداقة انهم مثلا مايتكلموش بعد10بليل

وفى ناس تكون واخدة موضوع المواعيد ده عادى جدا يقولولك ماهى كلها اوقات ربنا

شوف الايمان

وفى ناس تكون شايفة انهم مايسلموش على بعض بالايد وفى ناس موضوع الهزار و التهريج بالايدين ده عادى جدا

انا شايفة ان كلمة حدود دى لفظ مطاطى بلغة القانون

يعنى مش محدد وواضح وممكن يتفسر على مزاج كل واحد

عموما ملخص الرغى ده كله

انا بشوف ان مفيش حاجة اسمها صداقة بين الولد والبنت

وان اقصى حاجة بتكون بينهم

هى زمالة ليس الا

وبتكون فى اطار معين

يعنى اطار كلية -شغل

وبيكون فى حدود الموضوع

مجرد احترم متبادل و كلام عام و خلصنا

انما بقى رغى وتليفونات و خروجات

ده بصراحة اللى مش ببلعه

وبعتبر ان الصديق

حبيب محتمل

و بحس ان اللى بيخليهم من بعض قريبين اوى كده

هو الشعور الفطرى اللى جوا كل واحد فيهم بالميل ناحية الجنس التانى

لكن صداقة بمعناها المجرد

ماعتقدششش

يا ريت يا جماعة اشوف ارائكوا فى الكومنتس

وكل واحد يقولى هو شايف الصداقة صح ولا غلط و يشرحلى اسبابه

ويا ريت كمان تصوتوا فى الاستفتاء عشان اعرف احدد النسب

وتنويه اخير...يا جماعة رأيى ده اكيد زى اى حاجة تانية فى الدنيا تحتمل الصواب و الخطأ..

يعنى مش قصدى اجرح فى حد ...واى حد مقتنع بموضوع الصداقة بين الولد و البنت ..اكيد وجهة نظره تحترم و احب اشوفها وجهة نظره فى الكومنتس

مسابقة الاستظراف

2007-08-29T07:48:00.000+03:00

استكمالا لمسلسل الاستظرف و النصب و الاستخفاف لعقول الشعب المصرى..

من اول اعلان رنتك باسم حضرتك مرورا بتنزيل اجمد افيهات الافلام انتهاءا بالمسابقات المستفزة

نجد اعلان المسابقة اللى عمله المدعو ماجد الكدوانى

حقيقى قمة الاستهزاء و الاستخفاف بعقول الناس

يعنى المسابقة دى عدت حدود الاسئلة الهابلة اللى اللى فى بقية المسابقات

والاسئلة اللى من عينة

ما هو اسم النادى الذى حصل على بطولة دورى ابطال افريقيا 2006؟

النادى الاهلى

مركز شباب كهربة طلخا

مزارع دنيا

او مثلا

فى اى عام كانت حرب 73؟

لا لا الاعلان عدى المرحلة دى خاااالص

الاعلان عايزنا ندخل كود من 6 ارقام بالتخمبن عشان نكسب!!! يا نهار ابيض

اد كده بيتبص لعقلية الشعب المصرى بالاستخفاف ده

بجد حاجة تحزن

وانا متاكدة ان فى ناس هتحاول تبعت ارقام عشوائية ..شوفوا بقى كمية الاحتمالات عشان تقدر تخمن 6 ارقام بحالهم..لو اجنبى شاف الاعلان ده اكيد هيقول الناس دى هبل بكسر الهاء وتستاهل كل اللى يجرالهم..

سيبكوا من كل ده...طريقة الاعلان نفسه ..تحس انها موجهة للاطفال تحت سن 8 سنين

وطريقة كلام ماجد الكدوانى اللى هى المفروض انها تكون كوميدية يحسسك انك عيل صغير بيريل قدام التى فى

يلا المهم

احكلكوا موقف قبل كده حصل معايا وانا عندى بتاع 9/10 سنين كده

ايام زمان بقى واصالة اعلانات زمان

كانت فيه مسابقة على النايل تى مشهورة اوى

اسمها

Name the film

يجبلك لقطة من فيلم ويقولك الفيلم ده اسمه ايه و يجبلك اختيارات

احم.. قمت انا ماكدبتش خبر و سألتهم فى البيت عندى عن الاجابة

ورحت اتصلت بالرقم من غير ما يعرفوا

لاقتهم بيقولولى اجابتك صح ...لو كنت المتصل رقم الف ستربح معنا الجائزة

انا بقى زعلت اوى ان اجابتى صح بس انا مش الاتصال رقم الف

قمت بقى بكل عزيمة واصرار و التمعت عيناى بالامل ..قررت انى افضل وراهم وراهم لحد ما اجيب المتصل رقم الف:ي

اذكى اخواتى ماشاء الله عليا

المهم قعدت كده كذا يوم ..وبعدين زهقت و نسيت الموضوع وبطلت اتصل

لاقيت كده بعد فترة وجيزة

بابا بيقول لمامتى واختى

مش عارف ليه فاتورة الدولى جات لاماكن انا ماتصلتش بيها

مش فاكرة كان باين لندن و كندا

وهما كلهم بقى قعدين فى حيرة وانا معاهم:ي

بابا قال انا عايز اشتكى ليكون الخط بتاعنا مسروق

انا بقى قعدت كده افكر فى عقل بالى

وافتكرت حكاية المسابقة دى

بكل طفولة و براءة الاطفال فى عيني قلت لبابا على موضوع المسابقة ده وبعدين قولتله هو

ممكن يا بابا يكون ده السبب

موسيقى مسلسل الرجل الآخر

بابا بصلى بصة مش لطيفة وخلانى ائر بكل حاجة...قولتله طب اتاكد ان اللى انا عملته ده هو السبب....وراح سأل وبالفعل طلع الرقم اللى اللى انا اتصلت بي بره مصر :ي

احم طبعا سمعت كلميتن حلوين اوى من بابا

انا بقى بعزة نفس قلت

انا هدفعها خلاص يا بابا

كانت عزومة مراكبية :( :(

بابا بقى

اه طبعا هتدفيعها وانا ادفعها ليه

وروحت الاوضة بتاعتى اجر اذيال العار و الخزى و طلعت محفظتى

وطلعت القرشين اللى كنت مدكناهم

اصل انا كنت سوسة اوى وانا صغيرة وبعرف احوش

مش عارفة ايه الخيبة التقيلة اللى انا فيها دلوقتى

المهم كان باين المبلغ بتاع الفاتورة حوالى 280 او 300 مش فاكرة بس كان فى الحدود دى

روحت جيبت الفلوس و ادتها لبابا

وكان بالنسبالى مبلغ كبير وثروة كبيرة اوى ايام الرخص بقى

بس ماتخافوش اطمنوا عليا

بابا جنتيل وبعد شهر وشوية ادالى الفلوس تانى ...هو بس عمل كده عشان يربينى :s

والحمد لله اتربيت اهو وبكتبلكوا البوست اهو

_______________________

ملحوظة

ايمانا منى (حفظنى الله ) وحرصا منى على ترسيخ مبدأ الاعتراف بالحق فضيلة و البلوجرى مش بس بكلمته...

انا البوست اللى فات كنت بتكلم عن الحب...وقلت ان مفيش حاجة اسمها حب يعيش العمر كله وقلت اللى يعرف قصة اتنين فضلوا يحبوا بعض بعد الجواز 10 سنين على الاقل يقولى ...وانا هقوله ان انا اتكبست

والحمد لله انا جاية النهاردة اقول

انا اتكبستتتتتتتت :s :s

جالى ناس فى الكومنتس اللى هما

mraghy

hesa hanem

my hopes

وقالوا عن ناس متجوزة و بتحب بعضها حب الخطوبة اكتر من 10 سنين

مش عارفة ليه انا قلت 10 سنين بس...ماكنت احط شروط تعجيزية اكتر

:s يلا بقى حصل خير

وميرسى اوى اوى ليهم على ام رز و لحمة :ي

دورة الحب

2007-08-21T10:08:00.000+03:00

من خلال متابعتى للمدونات...لاقيت معظمها -ان ماكنش كلها- بتتكلم

عن الحب او بتكتب خواطر او اشعار رومانسية

حسيت ان انا فيا حاجة غلط

وجيت ابص كده لمواضعيى فى المدونة ...لاقيتها بعيدة كل البعد عن الرومانسية

يعنى مواضيعى معظمها قضايا عامة.. او بوستات بنشرها فى مدونة الاهلى اللى واكل دماغى ..ولما حبيت اغير ..نشرت قصة مغامرات كنت مآلفاها و عملت بوست بيتكلم عن النصب و حاجات عجيبة

مش عارفة ايه التشرد اللى انا فيه ده!

بس والله انا مش كده اوى، يعنى اكيد كل واحد جواه شوية رومانسية ..بس انا مش بعرف ابينها و بتكسف اصلا اخلى حد يقرى اى خواطر شعرية ليا او اى قصة رومانسية مألفاها يمكن المرة الوحيدة اللى جبت فيها اسم المدعو (الحب) فى المدونة دى ..كنت بتكلم فيها عن حب الشات بعنوان

حب الشات صباح الاشتغالات وكنت طبع مبهدلة الدنيا وناقص اقول الفاظ يعاقب عليها القانون للى عايشين فى الوهم بتاع حب الشات ده

المهم ما علينا

اوعى وشك نرمين النهاردة هتتكلم عن الحب

ملحوظة بس صغيرة كده قبل ما نبدأ

انا الحب اللى هتكلم عليه هو الحب بين الراجل و الست

عشان حب ربنا سبحانه وتعالى و دينه ورسوله الكريم عليه أفضل الصلاة و السلام

و الاهل و الابناء ده حب فطرى ..يبقى انسان مش طبيعى اللى مايحبش فى الحالة دى

انا بقى نيتى وحشة واقصد الحب اللى بين الراجل و الست:ي

طبعا اى بنى ادم طبيعى فى الدنيا بل اى كائن حى طبيعى بيكون محتاج احساس انه محبوب وان فى حد مايقدرش يعيش من غيره، والواحد بيعيش اجمل لحظات جميلة لما بيكون بيحب ..حتى لو كان الحب من طرف واحد ..على الرغم من عذابه و قسوته...الا ان كون ان القلب يحب حد بجد.. دى متعة لوحدها .

لكن بقى انا شايفة ..مع احترامى الشديد للحب وللى بيحبوا ان الحب ده عامل زى البونبوناية

(جمع بونبونى)

اللى طعمها حلو...مهما كانت كبيرة و طعمها حلو

لازم تخلص

عمرنا ما سمعنا عن بونبوناية ماخلصتش

وانا كمان ماسمعتش عن قصة حب استمرت طول عمر الطرفين

(الا طبعا فى الافلام و الحواديت)

وطبعا انا ماقصدش الحب التيك اواى ..اللى هو يكونوا بيحبوا بعض سنة يحسسونا خلاص انهم النهر الخالد...انا شايفة ان ماحدش يقدر يقول انه حب بجد ..الا لما تمر سنين...يكونوا مروا فيها بمراحل و تجارب و اختبارات كتيرة للحب ده..وكل مرة بيثبتوا فيها انهم اقوى من اى حاجة او من اى ظروف..لكن من مع الاسف ده مش موجود تقريبا ..عشان كده انا شايفة ان الحب اللى بنشوفه دلوقتى ده او فى معظم الحالات .الحب بيكون وقتى بيمر بكذا مرحلة و بعدين بح خلاص

يعنى انا شايفة ان الحب زيه زى اى
كل حاجة فى الدنيا دى بتمر بمراحل و بدورة معينة بعد ما بتمر بيها بتخلص وتنتهى

حتى فى الطبيعة

فى دورة الفوسفات ودورة العناصر

و دورة المياة

كعنصر طبيعى مش

الWC

يا خفيف

الحاجات دى بتبدا و تنتهى

الحب كمان بالظبط كده

يعنى حتى اللى اعرفه ان فى تعريفات كتيرة للحب و بتكون متدرجة..بصراحة انا مش عارفة ترتيبهم

لكن اللى اعرفه ان فيه الهيام والعشق و الصبابة و الغرام

والغرام دى أقصى درجات الحب

وحتى لما ربنا سبحانه وتعالى لما ضرب مثل فى القرآن الكريم عن الكافرين اللى هيدخلوا النار

ربنا يرحمنا جميعا

قال تعبيرا عن مدى الالتصاق و التبعية اللى هيكون من الكافرين للنار

"ان عذابها كان غراما" صدق الله العظيم

لكن بقى ماحدش كمل بعد الغرام ايه

انا اقولكوا بعد الغرام ايه

تعود

فتور

بخخخخخخخخخ خلاويص

انا عارفة ان كلامى يمكن يكون صادم للى بيحب

ويمكن يقول فى سره ايه البت الرخمة دى ومايجيش هنا تانى

بس دى الحقيقة اللى مش ممكن حد ينكرها

كنت فى مدونة سندباد وكان كاتب بوست استوحيت منه فكرة البوست ده

كان كاتب ان لو قصة الرومانسية المشهورة كانت كملت زى قيس و ليلة كانت هتبوووظ و هتتصدم بالواقع

وانا فعلا مؤمنة جدا بالكلام ده...مفيش اتنين هيفضلوا يقولوا لبعض بحبك ويحبوا بعض بنفس الدرجة طول العمر ...ودايما اسمع ان قصة الحب بتننهى بعد الجواز بسنتين تلاتة و الموضوع بيقلب فتور جدا ..ولو كنا متفائلين ..بتبتقى كده كلمتين حلوين فى عيد الحب وأعياد ميلادهم و عيد 6اكتوبر حلاوة الروح...لكن بقية السنة شكرا جزيلااااا

بلاش بقى الكلام المحفوظ بتاع ان هما اللى فى ايديهم يحافظوا على الحب ده ..والحب زرعة و نخلة لازم نرعاها...لان انا ماشوفتش حب بجد كمل للاخر قدامى

وطبعا ده مش عيب فى الجواز نفسه ..اد ماهو ناتج عن طول معاشرتهم لبعض

سواء جواز او لا

يمكن اكون متشائمة و اكون

غلطانة (يارب اطلع غلطانة) الواحد بيحس بامان لما يعرف ان فى حب بيعيش طول العمر ....يعنى من الأخر انا شايفة ان الشعور بالحب ده فترة مرحلية و خلاص

يا ريت يا جماعة اللى يعرف قصة اتنين حبوا بعض و اتجوزوا و عاشوا مع بعض فترة لا تقل عن 10 سنين ولسه بيحبوا بعض بنفس الدرجة يقولى فى الكومنتس ..وليكو عليا اعلنها و بكل صراحة واقول

انا اتكبسسسسسست ...فى حاجة اسمها حب بيعيش العمر كله

أحب أختم بكلمة أخيرة وبوجهها لنفسى قبل ما ما اوجهها لأى حد كنت قرتها قبل كده

هحاول افتكر نصها

الى كل باحث عن الحب

اعلم ان الحب و العشق يتحول مع مرور الوقت الى اخلاص و مودة و وفاء

فأبحث عن من فيه تلك الصفات